«JAS QANATTAR» қанат қақты
Астанада 21-22 ақпан күндері «Jas qanattar» жастар кәсіпкерлігі форумы өтті. Қазақстан жастарының күшін жеке бизнес ашуға жұмылдырып, сол арқылы жастар кәсіпкерлігін тұрақты даму деңгейіне шығаруды мақсат тұтқан республикалық шараға Қазақстан темір жолынан 10 жас қызметкер қатысты.
«ҚТЖ» ҰК» АҚ Адами ресурстарды басқару департаментінің бас менеджері Ақмарал Байғабылова бастап барған жастар қатарында Компания басқарма төрағасы жанындағы Жастар ісі жөніндегі кеңестің аймақтық өкілдері, атап айтқанда, Астанадан Гүлім Бейісбекова, Достық станциясынан Диас Байқонысов, Жамбылдан Дәулетбек Жолдасбаев, маңғыстаулық Қуатбек Көпбаев сынды жастар форумының үздіктері мен Қазақстан темір жолындағы «Жоба менеджменті», «Жас кәсіби маман» байқауларының жеңімпаздары болды.
Форум барысында кәсіпкерлікпен айналысатын жастар, жас бизнесмендер мәселесі талқыға түсті. Жиынға еліміздің 400-ге жуық жас кәсіпкері мен жеке кәсібін енді бастаушы жастар және спикер ретінде елімізге танымал тұлғалар қатысты. Мәселен, «Моңғол», «Тюльпан», «Айка» фильмдерінің продюсері Гүлнар Сарсенбаеваның бизнес пен шығармашылықты қалай ұштастыру туралы әңгімесі әсерлі болды.
Сонымен қатар, форумға Қазақстан іскер әйелдері ассоциациясы өкілдері мен өзге де қазақстандық танымал қоғам қайраткерлері, халықаралық сарапшылар, компания басшылары мен негізін қалаушылар және сенатор Дариға Назарбаева қатысты. Қонақтар жастармен кездесіп, тренингтер мен шеберлік кластарын өткізіп, сонымен қатар арнайы дайындалған, 35 табысты бизнес өкілдерінің портреті қойылған сурет көрмесін аралады. Форум бағдарламасы бірнеше тақырыптық дәрістер арқылы құрылған түрлі секциялардан тұрды. Атап айтқанда, бұл секцияларға «Кәсіпкерлікті дамыту үшін меторинг перспективалары», «Бизнеске арналған лайфхактар», «Жаңа технологиялар мен жаңа мүмкіндіктер», «Қазақстандық «Селф мейдтер» тарихы» деген тақырыптар арқау болды.
Осындай ауқымды шараның куәгері болған теміржолшы жастар атынан Диас Байқонысов өз әсерімен бөлісті.
– Форум кәсіпкерлікті дамыту әліппесін үйрету мектебі болды деуге болады. Мықты бизнесмендермен бетпе-бет кездесіп, әңгімесін тыңдадық, олардың өз істерін қалай бастағаны, қалай дамытқаны жайлы әңгімелері біз үшін өте әсерлі болды. «Көз қорқақ, қол батыр» екенін, яғни жеке бизнесіңді ашып, кәсіпкерлікпен айналысудың қиын емесін түсіндік, тек ынта мен ықылас болса, сосын әрине өз ісіңді таба білу. Мысалы, көп кәсіпкерлер өзінің сүйікті ісінің табысқа алып келгенін айтады. Бұл жерде менің түйгенім, адам өзі қалаған іспен айналысса ғана табысқа жетпек, – дейді жас теміржолшы.
Нұрай СӘРСЕНҒАЛИ
Суретті түсірген автор