Сегіз қырлы, бір сырлы
Шекаралық Достық станциясының пойыз қабылдап-тапсырушысы Қанапия Сұлтанғазинді әріптестері бекерден-бекер «сегіз қырлы, бір сырлы азамат» деп дәріптемесе керек. Расында, оның теміржолшы мамандығынан бөлек бір басына бірнеше өнер қонған жан екенін білдік.
Суретші-безендіруші мамандығы бойынша арнайы білімі бар ол еңбек жолын 2003 жылы Достық станциясында дәл осы кәсіптен бастапты. Уақыт өте келе теміржолшы кәсібіне бауыр басып, тасымалды ұйымдастыру бойынша жоғары білім алып, бүгінде, міне, талай жылдан бері пойыз қабылдаушы болып еңбек етіп келеді. Бірақ, қызметтестері мен ауылдастары арасында «суретші бала» деген аты қалып қойған, сондықтан Достықтағы барлық мекеменің, ғимараттардың маңдайшасынан бастап, ішкі атаулық жазбаларын жазу, әрлеу, әр кабинеттегі қабырға стенділерін жасау, жұмыс орнын талапқа сай бұрыштармен безендіру сынды жұмыстармен қосымша айналысып, халықаралық маңызды нысанның кескін-келбетін ажарландыруға атсалысып келе жатқалы 15-16 жыл өтіпті.
Әріптестерінің бірі, станция кезекшісі, әрі «ҚТЖ» ҰК» АҚ басқарма төрағасы жанындағы жастар ісі жөніндегі кеңестің Достық бойынша аймақтық төрағасы Диас Байқонысовтың айтуынша, Қанапия – сонымен қатар әншілік, күйшілік, іс-шараларды басқарып жүргізетін конференсьелік өнерімен де станцияның атын шығарып жүрген талантты теміржолшының бірі.
– Оның өнерін бәрі біледі, мойындайды, бағалайды. Онсыз Достықта бірде-бір шара өтпейді. Сондықтан әріптесімізбен мақтанамыз, – дейді Диас.
Бескөл станциясында дүниеге келіп, бүгінде Достықтың сыйлы азаматына айналған Қанапия теміржолдан бөлек, аудандық және облыстық шараларда да еңбегі еленіп, жоғары марапаттарға ие болып жүр. Еліміздің дамуы мен өркендеуіне қосқан үлесі үшін ҚР инвестициялар және инфрақұрылымдық даму министрі атынан, Теміржолшылар мерекесі мен Тәуелсіздіктің 25 жылдығында Алғыс хатқа, кәсіби шеберлігі үшін кәсіподақ атынан, Тасымал үдерісіне қосқан жеке үлесі үшін ҚТЖ басшылығынан, Ең үздік безендіруші ретінде станция басшылығынан Алғыс пен Құрмет грамотасын алса, Бүкіләлемдік еңбек қорғау күнінде Мадақтама, Кәсіподақтың 25 жылдығында төсбелгіге ие болған.
Нұрай СӘРСЕНҒАЛИ