Жол картасы – сыбайластыққа тосқауыл қоюдың басты тетігі
«ҚТЖ» ҰК» АҚ Теміржол тасымалы саласында тұрмыстық сыбайлас жемқорлықты жою жөніндегі жол картасына қол қойды. Аталған маңызды құжат сыбайластықтың алдын алу бағытында бірлесе әрекет етуге негіз қалап, аталған індетті жоюдың басты тетігіне айналуы тиіс.
Маңызды құжатқа Индустрия және инфрақұрылымдық даму министрлігі атынан Берік Камалиев, «Қазақстан темір жолы» ҰК» АҚ басқарма төрағасы Сауат Мыңбаев және Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы Алик Шпекбаевтың қол қоюы бұл бағыттағы іс-әрекеттердің батыл да табанды жүргізілетіндігінен хабар береді. Ашып айтар болсақ, жүк және жолаушы тасымалын жүзеге асыратын теміржол көлігінде жең ұшынан жалғасу, сыбайлас жемқорлық фактілерінің көрінісі аз емес. Сөз болып отырған жол картасы - теміржол саласындағы жүк және жолаушылар тасымалында сыбайлас жемқорлыққа қарсы іс-қимыл және алдын алу жөніндегі жұмыстардың басымдықтағы бағыттарын айқындап берген. Енді осы бағыттар бойынша бірлесе әрекет ету белсенді бола түсетіндігі айтпаса да түсінікті.
Нақтырақ айтқанда, теміржол вокзалдарына рейдтік іс-шараларды ұйымдастыру, билеттерді сату кезінде түрлі заң бұзушылықтарды шектеу мен бақылау, сондай-ақ, пойызға жолаушыларды отырғызудың заманауи тәсілдерін қолдану, билеттерді сату жүйесін жетілдіру тағысын тағы амал-тәсілдер қарастырылған. Бұлардың барлығы да Компания беделіне нұқсан келтіріп ғана қоймай, жолаушылар үшін үлкен ыңғайсыздықтар туғызып, еліміздің туристік имиджіне де салқынын тигізерін ерекше атап кеткен орынды.
Жүк тасымалы саласында сыбайлас жемқорлық тәуекелдері мен адами факторларды болдырмауға мүмкіндік беретін «Шарттық және коммерциялық жұмыс» автоматтандырылған басқару жүйесін жаңғырту, вагондарды диспетчерлендіру және басқару жүйесін енгізу жоспарлануда. Компания бұл бағытта көптеген жаңашылдықтар енгізіп, адами факторлардың болмауы жолында бірқатар жобаларды жүзеге асырды. Сондай-ақ біліктілік класы мен локомотивті басқаруға құқық беретін куәлікті алу үшін емтихан қабылдау және локомотивтік бригадаларын оқыту процесін бақылауды автоматтандыру да қарастырылған. Жолсеріктердің жолаушыларға барынша ізеттілігін таныту бағытында да оқыту мен үйрету жұмыстары белсенді жүргізіліп келеді.
Жол картасы өзіне сатып алу қызметтерін, кадр саясаты саласындағы сыбайлас жемқорлықтың алдын алу жөніндегі шараларды қамтиды. Кадрларды іріктеуде де бірқатар жаңашылдықтар енгізіліп, талаптар күшеюде. Бұл орайда кадрлардың біліктілігін арттыру үшін еліміздің бірқатар өңірлерінде арнайы оқыту орталықтары бар. Сол орталықтарда мамандар өз салалары бойынша біліктілігін арттырып, білімдерін толықтырып отырады.
Бұдан басқа, сыбайлас жемқорлыққа қарсы құлықты қалыптастыру мен заңбұзушылықтың алдын алуға бағытталған ақпараттық, ағартушылық және ұйымдастырушылық іс-шараларын өткізу де назардан тыс қалмаған. Жалпы сыбайлас жемқорлыққа қарсы жұмыстар мемлекеттік және құқық қорғау органдарымен тығыз ынтымақтастықта жүргізілуде. Бұл жұмыстар белгілі бір кезеңге ғана арналып тоқтап қалмай, өзінің жалғасын таба беретін болады.
Асқар ИСАҚОВ