Жас теміржолшылар турнирі
Биылғы Жастар жылының тұжырымдамасында жас буынның спортпен шұғылдануына бар жағдай жасалуы керектігіне баса назар аударылғаны белгілі.
Жуырда Жамбыл магистральдық желі бөлімшесі директоры Асқар Кукузовтың қолдауымен әрі Жамбыл жүк тасымалы бөлімшесі жастар ісі жөніндегі өңірлік өкілі Дәулетбек Жолдасбаевтың ұйымдастыруымен Тараз қаласындағы «Ұлан» стадионында бөлімшедегі жас теміржолшылардың арасында кіші футболдан турнир өтті. Спорттық шараның ашылу рәсіміне Жамбыл магистральдық желі бөлімшесі кәсіподақ ұйымының төрағасы Еркін Алтынбеков, Жамбыл сигнализация және байланыс дистанциясының директоры Аман Улакулов сынды бірқатар мекеме басшылары қатысып, жастарға жеңіс тіледі.
Спортпен айналысудың адам денсаулығына пайдасы, оның қоғамдағы маңыздылығы жөнінде ақылкеңестерін айтып өтті. Магистральдық желі бөлімшесіне қарасты алты құрылымның командалары арасында өткен турнир тартысты да шиеленісті өрбіді. Жеңіске деген талпыныстың әсері ме, кей коман да қызды-қыздымен тәртіп бұзып, төрешіден ескерту алып қалды. Тіпті қызыл карточкамен ойыннан шеттетілгендер де болды. Жалпы, турнир қорытындысында Жамбыл магистральдық желі бөлімшесінің командасы оқ бойы озық шығып, бірінші орынның 15 000 теңгесін иеленсе, ШЧ-36 мекемесінің футболшылары екінші орынның нәтижесін көрсетіп, 10 000 теңгенің сыйлығын еншіледі.
Үшінші орын алған ЭЧ21 командасы да 10 000 теңгені қанжығалады. Қатысқан басқа командаларға 5000 теңгенің ынталандыру сыйлығы берілді. Сондайақ, Тараз темір жол вокзалының басшысы Талғат Төлеубеков – үздік қақпашы, Түлкібас жол дистанциясының жол жөндеушісі Айдос Бурабаев – үздік қорғаушы, магистральдық желі бөлімшесінің көлік жүргізушісі Санат Сәрсекеев – үздік шабуылшы атанды. Жамбыл жол дистанциясының директоры Алтынбек Табылдиевтің командасы үздік үштік қатарына іліге алмаса да, жігіттерін ынталандырып өз қалтасынан 10 000 теңге жүлде ұстатты. Ойын қызығына түсіп кеткен жастар доп додасының кезекті турнирі қашан өтетінін сұрап, ағаларын қолқалап жатты.