Локомотившілер жарады
Жуырда Аягөз қаласында республикалық «Қарекет» қайырымдылық қорының жүлдесі үшін шағын футболдан жарыс өтті. Қала бойынша 17 команда қатысқан сайысшылар қатарында теміржолшылар да болды.
Бір ерекшелігі, әрбір қатысушы қайырымдылық мақсатында қорға 1000 теңгеден жарна қосты. Осылайша жүздеген мың теңге қаражат «Қарекет» қайырымдылық қорына аударылып, жарна есебінен жиналған қаржы әлеуметтік аз қамтылған отбасыларға үй сатып әперу мақсатына жұмсалатын болады. Ойын мейлінше тартысты өрбіп, жанкүйерлер үшін қызықты сәттерге толы болды. Барлық командалар жоғары даярлықпен келгендіктерін кездесулер барысында дәлелдей білді.
Десек те, ақтық финал барысында тек үздіктер ғана топ жарды. Сайыс қорытындысы бойынша 1-ші орынды 10810-әскери бөлімінің «Шығыс» командасы жеңіп алды. Жүлделі 2-ші орынды ТЧЭ-25 мекемесінің «Локомотив» командасы қанжығаға байласа, олардың салалық әріптестері Аягөз локомотив жөндеу депосының командасы үшінші орынды иеленді. Ал, команда капитаны, «тас қамал» қорғаушы Бақытжан Табанов осынау біріншіліктің үздік ойыншысы атанды. – Аягөздегі теміржол мекемелері арасындағы чемпион болғандықтан жігіттеріміз жарады. Жүлделі екінші және үшінші орынды локомотившілер алдық. Бірақ, мәселе жеңісте емес, мәселе қайырымдылық шарадан тыс қалмай, азаматтық ұстанымымызды білдіру,– дейді шараны ұйымдастырушылардың бірі Асхат Тілеубаев. Қайырымдылық мақсатында ұйымдастырылған сайыс соңында барлық жүлдегерлерге құрмет грамоталары табыс етілді.
Қуаныш ҚОЖАЕВ