Жолың болсын, Диас!
Алматы ЖТ бөлімшесінің теміржолшы жастары Диасты жақсы таниды. Ерекше статусқа ие шекаралық Достық станциясының жас маманы кез келген ортада өзінің алғырлығымен, креативті көзқарасымен ерекшеленеді. Өнертапқыштық – оның көп қырының бірі.
Қазіргі жаңа буын теміржолшы үшін тек жоғарғы оқу орнын бітіріп, инженер мамандығын алу жеткіліксіз. Бүгінгі теміржол көлігінің маманы талдау жасай алатын, үлкен көлемдегі ақпаратты қабылдауға қабілетті, ең бастысы өз ісіне берілген кәсіби маман болуы тиіс. Міне, Диастың ұстанымы осы. Жас жігіттің бойынан осынау қасиеттің бәрі табылады.
Әріптестері оны кәсіпорынның «ми орталығы» деп текке атамаса керек. Соңғы үш жылда 22 рационализаторлық ұсыныстың авторы және қосалқы авторы болған жас маман жұмыстан тыс уақытының бәрін осы өнертабысқа арнайтынын жасырмайды. Өндіріске пайдалы ұсыныс іздеп оны әзірлейді, тексереді және енгізеді, сондай-ақ техникалық қызмет көрсету, жүк және жолаушылар вагондарының бөлшектері мен тораптарын жөндеу бойынша нормативтік құжаттарға сәйкес технологиялық үдерістерді түзетеді.
Жақында Диас бастаған бірнеше озық ойлы жас инженерлер «Бағыттамалы бұрмалар», «Ажыратқыш айыр үшін стеллаж» оқыту макетін және пойыз қозғалысының қауіпсіздігін жақсартуға бағытталған бірқатар шешімдер әзірледі. Жалпы Диастың техникаға деген қызығушылығы бала кезінен басталған. Кез келген механизмнің құрылғысын ашып көру оған әрдайым қызық болыпты. Бірінші қатарда ойыншық машиналар, кейінірек велосипедтер, мопедтер және кез келген конструкциядағы техниканы жинау – оның сүйікті хоббиі болғанын жасырмайды. Сондықтан мектеп біріген соң ойланбай М.Тынышпаев атындағы көлік және коммуникация академиясының «Көлік, көліктік техника» факультетін «Вагондар» мамандығы бойынша оқып бітірді. Жолдама бойынша Достық станциясына келіп еңбек етіп жатқанына да бірнеше жыл. Еңбек жолын вагон қараушы болып бастап, кейін вагон паркінің сақталуы бойынша инспектор, инженер-технолог болды.
Сосын Диас қозғалыс саласының мамандығын меңгере бастады, пойыз құрастырушы болып жұмыс істеді, сосын станция кезекшісі болып ауысты. Ол – «ҚТЖ» ҰК» АҚ республикалық жастар форумының қатысушысы, жастардың аймақтық өкілі, 2016 жылы «Жас инженер-2016» аталымы бойынша арнайы дипломмен марапатталса, 2017 жылы жастар форумында «Жас теміржолшылар отбасы» сайысының жүлдегері болды. Ал былтыр «Қозғалыс шаруашылығының жас маманы» сайысының жеңімпазы атанды. Станцияның қоғамдық жұмыстарына белсенді қатысып, кез келген бұқаралық мерекелердің ұйымдастырушысы болып жүретін жасты бүкіл станциялықтар мақтан тұтады. Міне, өткен аптада басшылықтың шешімімен Диас Байғонысовтың қызметі өсіп, Алматы ЖТ бөлімшесіне қауіпсіздік бөлімінің маманы болып ауысты. Әрине, жігерлі жас жігітке бір орында тұрып қалмай өсу, өзін өзі дамыту қажет.
Дегенмен, Достық станциясының ұжымы, талай жыл шекара төсіндегі табиғаты қатал осынау бекетте бірге еңбек етіп, қызықты да қиындықты да бастан кешкен дос-жарандары, жолдастары оны қимай шығарып салды. «Жолың болсын, Диас! Ақ жол!» деп оның алдағы еңбегіне табыс тіледі.