Жақсылықтың үлкен-кішісі жоқ
Маңғыстау вагон пайдалану депосының теміржолшылары осымен үшінші жыл қатарынан депо орналасқан Мұнайлы ауданындағы аз қамтылған және көпбалалы отбасыларға қайырымдылық көрсетіп келеді.
«ҚТЖ» ҰК» АҚ басқарма төрағасы жанындағы Жастар кеңесінің Маңғыстау өңірі бойынша аймақтық өкілі, вагон қараушы Қуатбек Көпбаевтың айтуынша, биыл жыл басталғалы олар сондай 10 отбасына көмек көрсеткен.
– Көбіне ондай отбасылар тізімін аудандағы мешіт қызметкерлерінен аламыз, сонымен қатар көрші-қолаң арасында, таныстар ішінде қиналып жүрген отбасыларды байқасақ, соларға депо теміржолшыларының өз еріктерімен жинаған қаржысына күнделікті тұтынатын азық-түлік өнімдерін сатып алып, бірдей етіп бөліп, апарып береміз. Бұл ізгі шара жыл бойына жалғаса береді. Қаржының жиналған ретіне қарай кезекті отбасыларға көмек көрсетеміз, – дейді Қуатбек.
Оның айтуынша, деподан бөлек, аймақтағы барлық құрылымдық мекемелерде еңбек ететін жас теміржолшылар бірігіп, осындай шараларды ресми мерекелер, Қарттар күні, Жеңіс мейрамы қарсаңында да жыл сайын өткізіп тұрады. Азық-түліктен тарту етуден бөлек ерікті жас теміржолшылар өз орталарынан шыққан өнерпаздар күшімен концерттік бағдарламалар да ұйымдастырып, елдің алғысына бөленіп жүр.
Нұрай СӘРСЕНҒАЛИ