Маусымдық киімдермен қамтылуда
Аймақ теміржолшыларының еңбек және техникалық қауіпсіздігін сақтау мақсатында тақырыптық акциялар, арнайы техникалық сабақтар, семинарлар ұйымдастырылып, маусымдық киімдермен қамтылу мәселесі де толық шешімін табуда.
Мысалы, жылдың басында арнайы қыстық киіммен 420 дана төмен температурада суықтан қорғану костюмі, 840 пима, 1150 құлақшын, 735 жылы қолғап және 700 жұп жылы ботинкамен қамтылған теміржолшылар енді міне, көктем шыға жаз маусымына қажетті киімдерін ала бастады. Бөлімшеге қарасты станция-бекеттермен қатар Қызылорда локомотив пайдалану депосы мен Қазалы вагон пайдалану деполарының теміржолшылары да маусымдық киіммен кестеге сай қамтылуда екен.
– Жалпы биылғы жылдың басынан бері қыстық киіммен қатар жаз маусымына арналған 2250 дана мақтаматадан тігілген костюм, 1500 ерлер ботинкасы, 303 әйелдер ботинкасы, 874 сигналды жилет, 925 жаздық бас киім мен 19 000 дана қолғап алынып, таратылуда. Бұл киімдердің барлығы станция-бекеттердегі теміржолшыларға, сонымен бірге Қызылорда локомотив пайдалану және Қазалы вагон пайдалану деполарының теміржолшыларына қажеттілігіне қарай үлестіріліп беріледі, – дейді бөлімшенің техникалық бөлімінің еңбек қорғау және қауіпсіздік техникасы жөніндегі жетекші инженері Ғабит Тілеубаев.
Сонымен қатар жұмысшылар үшін жеке қорғаныс құралдары: 19 дана диэлектрлі боти, 294 дана диэлектрлі қолғап, 90 дана резеңке қолғап, 120 дана брезент қолғап және дәнекерлеушілерге арналған бірсыпыра арнайы киімдер алынған.
Ғабит Серікұлының айтуынша, теміржолшылар үшін арнайы жұмыс орындарының жұмыс жиһаздарымен, тұрмыстық техникамен жабдықтау шаралары да тұрақты түрде жүргізілуде екен. Еңбеккерлердің тұрмыстық қажеттілігі үшін мысалы 25 тоңазытқыш, 25 қысқа толқынды пеш, 15 электрлі шәйнек, 15 су диспансері, өтек және 6 кір жуу машиналары секілді тұрмыстық техикалардың алынуы үшін келісімшарт жасау жұмыстары жүргізілуде.