Түркістан қаласында спорттық-бұқаралық жарыс өтті
Өткен демалыс күні Түркістан қаласындағы «Нұр» спорт кешенінде Шымкент ЖТ бөлімшесінің жұмысшылары арасында спорттық-бұқаралық жарыс өтті. Жарысқа аймақтағы салалық кәсіпорындардан жасақталған 6 команда қатысты.
Олар Арыс станциясы, ТЧЭ-33, «ӘТЖК» АҚ, «ҚТЖ Экспресс» АҚ – ҚТЖЕ «Оңтүстік», НЖС-9 Түркістан станциясы мен вокзалы, «Транстелеком» командалары. Жарыс мини-футболдан, үстел теннисінен, шахматтан болды. Айта кету керек, кешенде спорттық жарыстың барлық түрін өткізуге қолайлы жағдай жасалған.
Сонымен, шахмат ойынын сарапқа салса, әйелдер арасынан 1-2-орынды Түркістан станциясынан Дана Темірбекова мен Әйгерім Қасымбекова иеленсе, 3-орынды локомотив пайдалану депосынан (ТЧЭ-33) Айнұр Қасымбекова жеңіп алды.
Ерлер арасында 1-орынды сол депоның жөндеу бөлімінің бастығы, шахматтан тұрақты қатысушы, спорт ардагері Нұрлан Сыздықов алса, 2-орынды Түркістан вокзалының шебері Қаныбек Омаров, ал 3-орынды «ҚТЖ Экспресс» АҚ – ҚТЖЕ «Оңтүстік » филиалынан Темірбай Құдайбергенов иеленді. Үстел теннисінен әйелдер арасында 1-орынды тағы да Түркістан станциясынан Әйгерім Қасымбекова, 2-орынды Дана Темірбекова, 3-орынды локомотив депосының аға шифрлаушысы Маржан Берсүгірова иеленді.
Ерлер арасында 1-орынды «Транстелеком» АҚ өкілі Серік Сапарбеков, 2-орынды локомотив депосынан машинистің көмекшісі Нұржан Дәулетбаев, 3-орынды Түркістан станциясы вокзалынан Қалдыбай Шотаев өзара бөлісті. Жарыстың ең қызықты да тартысты өткен бөлігі ол әрине, мини-футбол болды.
Шиеленісті де тартысты өткен жарыста соңғы кезге дейін қай команданың жеңетіні белгісіз еді. Жарыс айналмалы жүйе бойынша өтті. Шешуші айқаста 3-орынды «ҚТЖ Экспресс» АҚ филиалы «Южный» командасы алды. Ал финалға шыққан ТЧЭ-33 пен «ӘТЖК» АҚ командалары арасында өте тартысты ойын өрбіді. Нәтижесінде локомотившілер басым түсіп, ТЧЭ-33 командасы жеңімпаз болып танылса, «ӘТЖК» АҚ 2-ші орынды місе тұтты. Барлық жеңімпаздарға бағалы сыйлықтар мен грамоталар табыс етілді.
Жансая СЫДЫҚБАЙ