Жолаушыларға мерекелік көңіл күй сыйлады

1 мамыр – Қазақстан халқының бірлігі күніне орай «Нұрлы жол» вокзал кешенінде Қазақ радиосының ұйымдастыруымен мерекелік концерт өтті. Сазды-сауықтық бағдарлама – ұлттық радио мен жаңа вокзал кешенінің бірлескен жобасы.

Таяуда ғана «Нұрлы жол» вокзалы кешені мен Қазақ радиосы ұжымы арасында өзара тиімді ынтымақтастық орнағаны туралы хабарлаған болатынбыз. Міне, соның нәтижесі сәуір айынан бастап «Нұрлы жол» вокзалында қазақ радиосы ұдайы қосулы тұр, сапарға шыққан азаматтар мен қала қонақтарына кешеннен хабар таратады.

Осы ынтымақтастық шеңберінде ұйымдастырылып отырған бұл жолғы жобаның мақсаты – көпұлтты мемлекетімізді мекен еткен халықтың мызғымас бірлігін және ұлтаралық татулықты ұлықтау, республикамыздың барлық өңірін қамтитын Қазақ радиосының тікелей эфирі арқылы заманауи үлгідегі «Нұрлы жол» вокзал кешенін жалпақ жұртқа таныстырып, имиджін арттыру, танымалдық аясын кеңейту.

– «Нұрлы жол» вокзалы – сәулетті елордамыздың бас қақпасы, еліміздің барлық бағыттарына жолаушы пойыздарын аттандырып, күніне мыңдаған жолаушыларды сапарға шығарып салатын нағыз тоғыз жолдың торабы. Бірлік мерекесінде сондай үлкен сапарларға жолға шығып жатқан халықтың көңілін көтеріп, мерекелік көңіл-күй сыйласақ деген ниетпен бірлігі жарасқан көпұлтты мемлекетіміздің мерейін асырар мерекелік концертке Құрмаш Маханов, Индира Расылхан, Ерлан Рысқали, Шахаризат Сейдахмет, Аяулым Қамажан, Айбек Бекбосынов, Ләйлә Исаева, Оралхан Алтынбеков, Рухия Байдүкенова, «Дара» дуэті мен «Өрлеу» триосы сынды елге танымал өнер азаматтарын шақырдық, – дейді Қазақ радиосының директоры Серік Әбдуәлі.  

Шара аясында радио жүргізушілері көрермендер арасында радио мен вокзал және темір жол тарихы туралы сұрақ-жауап жарысын ұйымдастырып, дұрыс жауап бергендерге екі мекеме атынан сыйлықтар ұсынды. Көшпелі студия арқылы жолаушылармен, тұрғындармен тікелей эфирде сұхбат жүргізілді. Түрлі бағытта сапарға шығып бара жатқан жолаушылар ерекше концерттің куәсі болып, пойыздары хабарланғанға дейін қазақша әуен тыңдап, құлақ құрышын қандырды.

Солардың бірі Айтжан апа Нұр-Сұлтан қаласына балаларына қыдырып келіп, енді Семейге кетіп бара жатқанын, аяқасты осындай тамаша концерттің үстінен түскенін айтып, ұйымдастырушыларға алғысын білдірді. Ал тағы бір көрермен Бимәриям апа осы вокзалда баласы жұмыс істейтінін, сондықтан концерт тамашалауға әдейілеп келгенін жеткізді.