Шымкентте 45 теміржолшы отбасы спорттық ойынға қатысты
Жуырда 14 аймақтан келген 45 теміржолшы отбасы Шымкент қаласында бас қосты. «Қазақстандық салалық теміржол, автомобиль, әуе және су көлігі кәсіби одағы» қоғамдық бірлестігінің «ҚТЖ-Жүк тасымалы» филиалы ұйымдастырған спорттық шара мақсаты – биылғы Жастар жылына орай жас отбасыларды қолдау, бала мен атаананың қарым-қатынасын нығайтып, отбасы құндылығын арттыру.
Шырайлы қаланың шет жағындағы демалыс орнына жиналған отбасылар – ата-аналар мен олардың балалары арасында спорттық ойын түрлерінен жарыс өтті. Жиылғандар «Тұлпар», «Пуля», «Стрела» атты үш командаға бөлініп, өзара сайысты. Әр командада 15 ата-ана, 15 баладан болды.
«Биыл Елбасымыз Жастар жылы деп жариялады. Сол себепті, «ҚТЖ-Жүк тасымалы» АҚ филиалдарынан жас отбасыларды, яғни ата-аналары мен балаларын жинап, Шымкент қаласында спорт жарысын өткізіп отырмыз. Бұл шара, біріншіден, жастар жылына орай өткізілсе, екіншіден, бала мен ата-ана қарым-қатынасын нығайтуға бағытталған. Үшіншіден, шараға үйде декреттік демалыста отырған аналарды да қатыстырып, олардың көңілін көтеру үшін ұйымдастырдық. Іріктер кезде біз, әрине, осыған дейін де спорттық шараларға белсенді қатысып жүрген отбасыларды таңдадық. Ойынға әр өңірден 45 ата-ана мен 7-10 жас аралығындағы 45 бала іріктелініп алынды. Спорттық шарадан басқа, алда арнайы экскурсиямыз бар. Шымкент мәдени көне қала болғандықтан көрсететін жерлер көп. Оның үстіне, жаңадан ашылған Түркістан облысына да саяхат жасап, тарихи да киелі жерлерді аралатып, өзіміздің кең-байтақ отанымыздың құндылықтарын жас отбасылар мен олардың балаларына таныстыруды мақсат тұтып отырмыз», – деді Орталық аппараттың «ҚТЖ-Жүк тасымалы» АҚ кәсіподағының бас бухгалтері Айқын Өтегенов.
Айта кетейік, мұндай шара 2017 жылы ЭКСПО халықаралық көрмесіне орай Астана қаласында өткізілсе, 2018 жылы балаларды Алматыда өткен Универсиаданың спорт кешендерімен таныстырған болатын. Шараға теміржолшылардың 9-11 сынып оқитын балалары қатысты.
«Командааралық жарыста «Тұлпар» командасы айқын басымдылықпен жеңіске жетті. Дегенмен, он бес адамнан үш командаға бөлініп, әр өңірден 3 отбасы, 3 бала топтасқан командада ана өңір немесе мына өңір жеңді деуге келмейді, сайып келгенде жарысқа қатысқан 90 адамның бәрі жеңімпаз. Ұйымдастырушылар олардың бәрін әдейі жеке өңірге бөлмей, бір-бірімен араластырып ойнатыпты. Бір-бірімен таныссын, аралассын деген мақсат болған көрінеді.
Шара соңында барлық жеңімпаз ата-аналар мен балаларға бағалы сыйлықтар мен алғыс хаттар табыс етілді. «ҚТЖ-Жүк тасымалы» АҚ – Шымкент филиалының кәсіподақ комитеті төрағасы Хайрулла Сәрсенов келген қонақтарға жылы лебізі мен алғысын білдіріп, өз атынан Шымкенттің қызғалдақ бейнесі бар бокалдарын сыйға тарту етті.
Спорттық шарадан соң әр аймақтан келген қонақтар шырайлы қаланың көрікті жерлерін аралады. Атап айтқанда, зообақ, дендробақ, мұражайлар мен Жеңіс саябағы көпшіліктің зор қызығушылығын туғызды. Бұдан кейін Түркістан облысы, Түркістан қаласына бет алып, киелі жерлерді, сан ғасырлық тарихы бар атақты Қожа Ахмет Яссауи кесенесін тамашалап, естелік суреттерге түсті.
Шараға Екібастұз қаласынан келген қонақ Гүлнәр Жүсіпова станцияда жүк қабылдап-тапсырушы болып жұмыс істейді. Ол жарысқа 10 жасар қызы Дилярамен бірге келген. «Шымкент өте әдемі қала екен, бірінші рет келіп тұрмыз. Қала қатты ұнады. Алған әсеріміз тамаша. Табиғаты жылы, жап-жасыл қала», – деп тамсанды Гүлнәр Асқарқызы.
Жас теміржолшы отбасылары естен кетпестей ерекше әсер қалдырған шараны ұйымдастырушыларға алғыстарын жеткізді.
Жансая СЫДЫҚБАЙ