Достық станциясының қызметкерлері түлектерді жұмысқа шақырды
Достық станциясының қызметкерлері станциядағы орта мектептің 9-11 сынып оқушыларымен кездесіп, оларды темір жолда білім алып, қызмет етуге шақырды.
«ҚТЖ» ҰК» АҚ басқарма төрағасы жанындағы Жастар кеңесінің аталған станция бойынша аймақтық өкілі Данияр Бимашев пен станцияның бас бухгалтерінің орынбасары Сәкен Ысқақов кездесу барысында оқушыларды темір жол мамандықтары, осы саладағы жұмыстардың негізгі бағыттарымен таныстырды.
– Оқу жылы аяқталар тұста мектеп бітіруші түлектердің ой-пікірін біліп, олардың арасынан темір жолға деген қызығушылығы бар балаларға сала бойынша оқытатын оқу орындары жөнінде ақпарат бердік. Бұл кездесу бізде әлеуметтік бағыттағы жұмыстар аясында ұйымдастырылды. Оқу ерекшеліктері, білім алып болғасын жұмысқа қалай орналасуға болатынын, жалпы теміржолшы болудың қыр-сырын балаларға түсіндіруге тырыстық. Қандай гранттар бөлінетінін, жеңілдіктер жайында сөз еттік, – дейді Д.Бимашев.
Расында, өмірде мамандық таңдаудан жаңылыспау керек, сондықтан сала мамандары жас буынның болашағына алаңдап, оларға қазіргі таңда қандай мамандықтар сұраныста екенінен де хабардар етіп, кеңес берген.