Ақтөбеде «Темір жол – қауіпті аймақ» шарасы өтті
Ақтөбе облысы бойынша меншікті тілші
Ақтөбе станциясының басшылары рейд жұмысына шықты. Теміржолшылар жаяу жүргіншілерге стратегиялық аймақтың қауіпті екенін ескертіп, қауіпсіздік ережелерін қатаң сақтауға шақырды.
Ақтөбе станциясы басшылығының ұйымдастыруымен «Темір жол – қауіпті аймақ» шарасы өтті. Аталмыш шараға станция ұжымынан бөлек желілік полиция бөлімінің қызметкерлері, локомотив пайдалану депосы, Ақтөбе көлік және тасымалдауды ұйымдастыру мекемесі мен колледж студенттері атсалысты. Белгіленбеген жерден өтудің қауіптілігін түсіндірген мамандар ақпараттар жазылған парақшалар таратты.
«Мұндай іс шара ай сайын өткізіліп тұрады. Қаншалықты ескерту алғанымен бөгде адамдардың қауіпті аймақтан өтуі азаяр емес. Станция қоршауларын бөгде адамдар өзіне керек жерден бұзып, қолайлы жерге өткел салып алған. Жыл басынан бері Қазақстан Республикасының аумағындағы темір жол бойында, төрт айдың ішінде 9 темір жол көлігімен адам қағу оқиғасы тіркелді. Оның ішінде 5 адам өліміне алып келген. 9 оқиғаның үшеуінде кәмелетке толмаған балалар, өкінішке орай, екі баланың өмірін сақтап қалу мүмкіндігі болмаған. Ал біздің станция аумағында мұндай жағдай тіркелген жоқ. Дегенмен, бөгде адамдардың белгіленбеген жермен жүруі қиындықтар әкеледі», – дейді Ақтөбе станциясының бастығы Нұрлан Ермағамбетов.
Мамандар әр жүргіншіні жекелеп тоқтатып, түсіндіру жұмыстарын жүргізді. Кейін Ақтөбе көлік және тасымалдауды ұйымдастыру жаңа технологиялар колледжінің студенттерімен осы мақсатта кездесу өткізіліп, бейнероликтер көрсетілді.