Семейде теміржолшылардын арасында бильярдтан біріншілік өтті
![](https://rail-news.kz/uploads/posts/2019/5/30/1559216146706.jpg)
![](https://rail-news.kz/img/noimg.png)
Абай облысы бойынша меншікті тілші
Жуырда Семей ЖТ бөлімшесі бойынша үстел спортының ерекше түрі, яғни, бильярд ойынынан теміржолшы ерлер арасында тұңғыш рет бөлімше біріншілігі болып өтті.
Асқан шеберлікті, кәсібилікті, мергендік пен төзімді талап ететін бұл ойын түріне теміржолшылар көп әуес емес болып шықты. Себебі, осынау сайысқа азын-аулақ адам ғана өтініш білдірген екен. Дегенмен, «Локомотив» спорт клубының нұсқаушылары үшін жеңімпаздарды анықтау қиынға түскен жоқ.
Аталмыш біріншілікке әсіресе Семей магистральдық желі бөлімшесінің теміржолшылары мен олардың жанкүйерлері мол жиналған болатын. Тастаяқпен шарды көздеп ұруда Семей байланыс және белгі беру дистанциясы мен Жаңа-Семей жол дистанциясының жігіттеріне ешкім жетпеді.
– Кийді қолға ұстаудың өзі де шеберлікті талап етеді. Одан бөлек бильярдтың өзіндік әдіс-тәсілдері де көп. Арнайы жабдықталған алаңды талап ететіндіктен, әрі спорттың бұл түрі олимпиада мен өзге де спартакиадалық ойындар құрамына енгізілмегендіктен болса керек, сала қызметкерлерінің арасында да кенжелеп тұр. Әйтсе де, ынта білдірген теміржолшылар арасынан жеңімпаздар анықталды,– дейді аталмыш сайысты ұйымдастырушы, «Локомотив» спорт клубының спорт нұсқаушысы Жанат Мойынбаев.
Тастаяқ ойынының нәтижесінде бірінші орынды Ғалым Сүлейменов жеңіп алып, кербез ойынның чемпионы атанды. Ал екінші орынды ШЧ-29 мекемесінен Берік Смағұлов иеленді. Жүлделі үшінші орын Дулат Оразбаевқа бұйырса, төртінші орынды Жаңа-Семей жол дистанциясынан Қанат Абдуғалиев қанағат тұтты.