Маңғыстауда «Жетім көрсең, жебей жүр» қайырымдылық акциясы өткізілді
Маңғыстау вагон пайдалану депосының, атап айтқанда, депоның Маңғыстау станциясындағы техникалық қызмет көрсету қосынының вагоншылары және кеңсе қызметкерлері бірігіп, «Жетім көрсең, жебей жүр» қайырымдылық акциясын ұйымдастырды.
ВЧД-33 мекемесінің персонал жөніндегі менеджері Ләззат Есжанованың айтуынша, акция аясында жиналған қаржыға олар Мұнайлы ауданында тұратын 8 отбасыға көмек көрсеткен. Жетім бала тәрбиеленіп жатқан және көпбалалы, жағдайы төмен отбасыларға ең қажетті азық-түліктер сатып әперілген.
– Бұл жыл басынан бері өткізіліп отырған бірінші қайырымдылық шарасы емес, алдағы уақытта да теміржолшылардың өз еркімен қаржы жиналып жатса, осындай отбасыларға тағы көмегімізді көрсетеміз. Рамазан айы аяқталар тұста жасап жатқан бұл шарапатты іске атсалысқан әріптестерге алғысым шексіз. Қайырымдылық жасалған жандар да бізге ризашылықтарын білдіруде. Бір-бірімізді қолдап, сүйеніш бола алсақ, ол да үлкен мәртебе емес пе?! – дейді Ләззат Есжанова.