Теміржолшылардың балалары Машат лагерінде демалады
Шымкент қаласы бойынша меншікті тілшісі
Биылғы жазда Шымкент ЖТ бөлімшесі теміржолшыларының балалары жылдағыдай табиғаты көркем, ауасы таза, Түлкібас ауданында орналасқан Машат лагерінде демалады.
Маусымның алғашқы онкүндігінде Шымкент бөлімшесінен алғашқы лекпен аттанған 25 бала тамылжыған табиғат аясында 14 күн демалып оралды. Ал 24 маусым күні екінші кезекке жолдама алған 100 бала бүгінгі таңда лагерьде жаз қызықтарын бастан кешіп жатыр. Оңтүстік өңірде туризм саласында келушілерді қызықтыра білетін дема лыс орындары өте көп. Соның бірі – осы Машат лагері. Мұнда балаларға арналған қызықты бағдарламалар жетерлік, барлық жағдай жасалған. Онда маусым бойы білікті медицина қызметкерлері мен педагогтар лагерьге келген балалардың тәрбиесіне баскөз болады. Сонымен қатар, демалыс орнында кез келген болуы ықтимал қауіп-қатерлер ескеріліп, өрт және санитарлық нормалардың бәрі де алдын ала қамдастырылған. Балалар мұнда тек қана тамақтанып қоймай, бассейнде жүзеді, спорттың түртүрімен айналысып, өзара сайысады. Балалардың қауіпсіздігіне аймақтық кәсіподақ комитеті жауап береді. НОД ГП-9 бойынша қызметкерлермен жұмыс жасау бөлімінің бастығы Серік Тілеуімбетов биыл балалар демалысына 175 жолдама берілгенін айтып өтті.
«Бірінші кезек 10 маусымнан басталды.7 және 14 жас аралығындағы 25 бала бүгінгі таңда лагерьге барып келіп қойды. 24 маусымда екінші кезеңмен 100 бала Машат лагерінде демалуда. Ал үшінші кезең 8 тамызда басталады. Оған қалған 50 бала барады. Осымен биылғы жылға 175 баланы жазғы демалыспен қамтимыз», – дейді Серік Тілеуімбетов.
Оның айтуынша, былтырғы жылмен салыстырғанда биыл балаларға жолдама аз бөлініпті. Былтыр бөлімше бойынша 475 бала барған екен. Ал биылғы квота бар болғаны 175 екен. «Биыл тек біздің бөлімшеде ғана емес, бүкіл филиалдарда солай аз бөлініп отыр», – дейді қызметкерлермен жұмыс жасау бөлімінің бастығы. Айта кетейік, жолдама бөлер кезде көпбалалы, әлеуметтік жағдайы төмен отбасылар мен мүмкіндігі шектеулі балаларға басымдық беріліпті. – Біздің міндетіміз – балаларға жолдама беру ғана емес, оларға ыңғайлы, қауіпсіз, танымдық көкжиегін кеңейтетін орта сыйлау. Балаларға естен кетпес тамаша әсер қалдыру, – деді С.Тілеуімбетов.