Арыстан 100 бала «Машат» лагеріне жазғы демалысын өткізуге аттанды

Сенбі күні Арыс қаласынан 100 бала «Машат» лагеріне жазғы демалысын өткізуге аттанды. Балалар алдымен қаламаңы тасымалы арқылы Шымкент вокзалына келді. Ол жерден арнайы екі автобуспен Манкент маңындағы лагерьге қарай бет алды.

«Жаз жайнатып, күн күлдіріп, біз лагерьге барамыз...» деп әндеткен балалардың қуанышында шек жоқ. 7 және 14 жас аралығындағы балалар үшін жолдаманың құны – 40 мың теңге. «Теміржолшы атааналар жеңілдікпен ол соманың тек алты мыңын ғана төлейді» дейді Шымкент жүк тасымалы бөлімшесінің қызметкерлермен жұмыс жасау бөлімінің бастығы Серік Тілеуімбетов.

Биыл 7-сыныпқа өтетін Нұрасыл Серікбайұлы лагерьге бірінші рет бара жатыр. Ол демалыс аймағында есте қалатын қызықты күндердің көп боларына, жаңа достар табарына сенімді. Ал Айғаным Қалмахан лагерьге екінші рет бара жатқанын, Машат оған қатты ұнайтынын айтты.

Арыс қаласынан барған балаларды жастарына қарай 9 жасаққа бөледі екен. Бір бөлмеде 5 баладан жайғасады. Төрт мезгіл тамақ беріледі. «Лагерьдің бағдарламасы өте қызықты, мәдени-спорттық шараларға толы. Атап айтқанда, балалар күн сайын таңертең жаттығу жасайды, екі рет бассейнге түседі. Одан бөлек, балаларға арналған шахмат, дойбы, пейнтбол үйірмелері жұмыс істейді. Кешкісін далада ашық сахнада концерт қойылып, соңы балалар би кешіне ұласады. Арнайы диджей түрлі-түсті әуендермен кешті шаттыққа бөлейді. Балақайлар үшін қызық көп болмақ», – дейді ұйымдастырушылар.

360 бала қабылдайтын «Машат» лагеріндегі бұл лек үшінші маусым екен. Демалыс аймағында 26 қызметкер бар: педиатр, дене шынықтырудан жаттықтырушы, үйірме үйретушілері, аула тазалаушылар мен кір жуушылар.

Республикалық маңызы бар лагерьге еліміздің өзге аймақтарынан да балалар келіп жатады. Бұған қоса, лагерь жанында балаларға арналған дүкен бар. Онда оқушылар балмұздақ, печенье, тәтті сусын, т.б. сатып ала алады.