Теміржолшылар «Тіл тану» интеллектуалды ойын бағдарламасына қатысты
Жақында «ҚТЖ» ҰК» АҚ-ның бір топ қызметкерлері «Хабар» телеарнасындағы «Тіл тану» интеллектуалды ойын бағдарламасына қатысты.
Теміржол көлігінің қызметкерлері осындай қоғамдық шаралардан да тыс қалмай, өздерінің жан-жақты қоғам мүшелері екенін дәлелдеп жүр. Компанияның Адами ресурстарды басқару департаментінің бас менеджері Ақмарал Байғабылова бастаған теміржол саласының қызметкерлері аталған сайыста ЭЙР Астана компаниясындағы әріптестерімен жарысып бақ сынасқан. Негізінен зиялы қауым өкілдері, ақынжазушылар, журналистер арасында өтетін ойынның кезекті саны көлік қызметкерлерінің арасында ұйымдастырылыпты.
– Дайындығымыз аз болса да, аяқасты команда құрып, ойынға шақыртқан соң барып қатыстық. Ойын 4 кезеңнен тұрды. Біріншісі, еліміз енді ғана көшіп жатқан латын әріптерімен қала атауларын дұрыс құрастырып жазу сайысы болды. Екіншісі бойынша, 10 беттік мәтіннің ішінен қазақтың көнерген сөздерін табу керек болды. Үшінші кезеңінде, кез келген орыс тіліндегі фильм, мультфильмнен үзінді тыңдатқызды, 1 минутта 2 рет қана көріп шыққасын, сол үзіндідегі мәтінді қазақшаға аударып, өзіміз соны дыбыстап бердік. Ал соңғы сынақта орыс тілінен енген кейбір кірме сөздерді, мәселен, селфи, банкомат сынды сөздердің қазақша баламасын өз ойы- мыздан шығарып, өз нұсқамызды ұсындық. Жеңіс те, жеңіліс те болды. Біз қатысқан бағдарлама эфирден осы жылы қыркүйек айында көрсетіледі, – дейді А.Байғабылова.
Қашан да компанияның қоғамдық өмірінде ерекше белсенділігімен көрініп, жастарды алға жетелеуден жалықпайтын бас менеджер аталған бағдарламаға қатысқан әріптестері Айбек Оспанов пен Сәуле Қалмағанбетоваға табандылықтары үшін алғыс білдірді. Ойын нәтижесінде әуе көлігі қызметкерлері аз ғана артық ұпаймен алға шығып, жеңіп кеткенімен, теміржолшылар командасы да осал емес екендіктерін танытты.