Жайдарманшылар: шығыстың жігіттері шырайын кіргізді

Жазғы лагерьдің екінші күнінде ұтқыр да тапқыр жастардан құралған «Жайдарманшылар» ойын көрігін қыздырды. Онда еліміздің шығыс өңірлері бойынша үш облыстың командасы өнер көрсетті. Теміржолшыларды республикалық деңгейдегі ойындарда танытып жүрген Бейімбет жүргізген жарыстың шырайын шығыстың жігіттері кіргізді.

Соның ішінде өскемендік команда басқа қарсыластарынан өзіндік актерлік шеберліктері мен сахналық қойылымдарының мән-мағынасы жағынан да оқ бойы озық болды. Басынан бастасақ, павлодарлық «14 регион» командасы, өскемендік «Өскемен» құрамасы, семейлік «Шығыстық экспресс» командасы өнер көрсеткен жайдарман ойындарына «Қазпрофтранс» ҚБ төрағасының орынбасары Нұрлан Нұрпейісов, «ҚТЖ» ҰК» АҚ-ның Адами ресурстарды басқару департаментінің бас менеджері Ақмарал Байғабылова мен танымал жайдарманшылар қазылық етті.

Жарыстың беташары – «Визитка» кезеңі бойынша әр команда шағын әзілдері және көңілді әуенмен әрленген қағытпа сөздерімен көрермендермен амандасып алды. Жайдарманшылар барлық шығарылымдарында өз кәсіптеріне қатысты теміржолшылар өмірі, сонымен қатар күнделікті тұрмыстағы мәселелер, қазіргі қоғамдағы түйткілді жайттарды тақырыпқа арқау етті.

Бірақ, «жүйріктен жүйрік озар жарысқанда» демекші, бірінші кезең бойынша топтар арасынан өскемендік құрама суырылып алға шықты. Екінші кезеңінде үздік әзілдер айтудан жарысқан командалар арасында тағы да алға шыққан өскемендік Мұхтарбектің теміржолшылар туралы соңғы әзілі жаппай күлкіге қарық қылып, оларды жеңіске жеткізді. «Жақында келіндер сайысы болды. Ол жерде шай құюдан, еден жуудан, шаң сүртуден жарысты. Бірінші орынды машинист көмекшісі жеңіп алды» деген ұтымды әзіл болатын ол.

Соңғы кезең – «Үй тапсырмасында» барлық командалар жарысқа жайдарманшылардың пойызбен келер жолдағы бастан өткерген оқиғаларына негізделді. Дегенмен, лагерьдің бірінші күнінде ойын көрсеткен батыс өңірінің командаларына қарағанда шығыстық құрамалардың дайындықтары кей жағынан кемшін болғаны да сыналды. Жарыс нәтижесінде қазылар алқасы бірауыздан Жайдарманның «Үздік үй тапсырмасы» номинациясымен семейлік теміржолшыларды марапаттады. Бұл жайдарманның «изюминкасы» болған Джаконда деген лақап аты бар өскемендік Мұхтарбек «Үздік жайдарман ойыншысы» марапатын жеңіп алды. Сонымен қатар «Үздік визитка» марапатына павлодарлықтар ие болды. Ал «Үздік әзіл» дипломы семейліктерге табыс етілді. Ал шығыс жайдарманшылары арасынан жеңімпаз топ ретінде бірінші орын жүлдесімен өскемендік құрама марапатталды.