Үздік жайдарман ойыншысы - электр монтері
«Қазақстан теміржолшысы» газетінің тілшісі
Биылғы жазғы корпоративтік лагерьде «Жайдарман» ойындарының шығыс өңірлері бойынша «Үздік жайдарман ойыншысы» атанған Мұхтарбек Ақатаев Өскеменде ШЧ-28 мекемесінде электр монтері болып еңбек етеді.
Көпшілікті сыртқы түр келбеті, сахнадағы тартымдылығы, көрерменді баурап алатын харизмасы арқылы, сонымен қатар өткір әзілдерді күлдіре отырып шебер жеткізе алуымен ә дегеннен-ақ көрерменді баурап алып, үздіктер қатарына өткен Мұхтарбектің биыл ғана жоғары оқу орнын тәмамдап, қызметіне кіріскеніне небәрі 3 ай болған. Әкесі Қайратбек Өскемендегі Коршуново станциясының кезекшісі болса, анасы сол станцияда жүк қабылдап-жөнелтуші, ал әпкесі Дана өзі еңбек ететін ұжымда әріптесі екен. Шығыс Қазақстан мемлекеттік техникалық университетінің көлік саласы бойынша инженерия факультетін тәмамдаған Мұхтарбек әулеттің көшін одан әрі жалғап, алған білімін тәжірибемен ұштастыруда. Ал көңілді де тапқырлар клубы – жайдармандағы өнері оның мектеп кезінен бастау алған.
– Алдымен мектеп қабырғасында, кейіннен университетте де «Жайдарман» ойындарына қатысып, бұл менің хоббиыма айналды. Бұрынғы «даңқымды» естіп біліп, басшылық мені және қасымдағы локомотив шаруашылығындағы жігіттерді қосып, Өскемен құрамасын дайындап жіберді, – деп әзілдеген жас жігіт күліп алды, – Сценарийді жазғанда тақырыптарды өмірден, қоғамдағы болып жатқан оқиғалардан аламыз. Негізінен әзілдер өтімді болу үшін аудиторияның қандай екеніне мән береміз. Біздің аудитория теміржолшылар болғандықтан сол тақырыпқа басымдық бердік.
Жалпы, теміржол саласына кездейсоқ келмеген, Ақатаевтар династиясының бір өкілі Мұхтарбектің алға қойған арман-мақсаты көп, өз кәсібінің маманы болуды мақсат тұтады. Әзірге үйренуші, тәжірибе жинақтауда. Алдыңғы буын теміржолшылардың қасында көмектесіп жүріп, КИП байланыс бойынша станцияаралық сымдардың ақаусыз жұмыс істеуі, үзілмеуі, аккумуляторды ауыстыру, құралдардың тазалығы сынды тағы басқа жұмыстарды жасауда. Теміржолды – тек әулет жолын жалғау үшін ғана емес, жан қалауымен таңдаған Мұхтарбек болашағынан зор үміт күтетін мамандардың бірі деп санайды басшылық.