Теміржолшылардың балалары арасында сурет байқауы өтті
«Теміржол, автомобиль, әуе және су көлігі қызметкерлерінің кәсіби одағы» қоғамдық бірлестігінің бастамасымен, ЖТ Жамбыл бөлімшесі кәсіподақ ұйымының ұйымдастыруымен теміржолшылардың балалары арасында «Балауса болашақ» сурет байқауы өтті.
Балалар мен жасөспірімдер қатысқан шарада 5-7 жас аралығындағы балалар еркін тақырыпта, 8-11 жастағылар «Қазақстан темір жолына – 115 жыл», ал 12-14 жастағылар «Еңбек қауіпсіздігі – балалар көзімен» деген тақырыптарда көркем ойларын қылқаламмен бейнеледі. Айта кетерлігі, байқау биылдыққа осымен екінші рет ұйымдастырылып отыр. Алғашқы байқауда бөлімшеден небәрі 14 бала бақ сынаса, бұл жолы 45 жеткіншек қызығушылық танытып, акварель, гуаш, акрил, қылқаламмен салынған суреттерін қазылар алқасына ұсынды. Балалардың еңбегінен олардың теміржол тақырыбын тәптәуір білетінін, қауіпсіздік тақырыбын да аша алғанын аңғаруға болады. Байқау нәтижесінде жастарына қарай бірінші, екінші, үшінші орын жеңімпаздары анықталып, бағалы сыйлықтармен және дипломдармен марапатталды. Енді жеңімпаздардың жұмыстары ҚТЖ орталық аппаратына жөнелтіліп, байқаудың келесі кезеңіне қатыспақ. Жоғары баға алған жұмыстар постер, буклет, күнтізбе, брошюра, плакаттарға үлкейтіліп шығарылады деп жоспарлануда. Байқау барысында балақайларға балмұздақтар мен тәтті сусындар үлестіріліп, балғындарға мереке сыйлады.