Рухани керуен - Достық станциясында
«Қазақстан теміржолшысы» газетінің тілшісі
Жуырда Достық станциясында «Рухани керуен» жобасы аясында жиын өтті. Рухани құндылықтарды дәріптей отырып, әрбір қазақстандықтың рухани санасын жаңғырту, туған жерге деген сүйіспеншілігі мен патриоттық сезімін арттыруды көздеген жиынға шекаралық бекет теміржолшылары қатысты.
Станцияның өндірістік оқыту инструкторы Қанат Машариповтың айтуынша, Алматы облыстық дін істері басқармасының мұрындық болуымен ұйымдастырылған шара Елбасының «Болашаққа бағдар: рухани жаңғыру» бағдарламасы аясында қолға алынып отыр. Өңірде 2017 жылы басталған бастаманың басты мақсаты – Қазақстан халқының дәстүрлі рухани мәдениетін ілгерілету, мемлекетіміздің рухани тірегі, дініміздің жалпыға ортақ адамгершілік қағидасын насихаттау, рухани құндылықтарды жаңғырту және деструктивті діни ағымдарға қарсы имммунитет қалыптастыру, жастардың дәстүрлі дінге деген көзғарасын айқындап, қазақтың төл мәдениеті мен тілін, салт-дәстүр, әдеп-ғұрпын насихаттау.
– Елбасы өз мақаласында саяси жаңғырудың да, экономикалық жаңғырудың да табысты болуы бірінші кезекте қоғамдық сананың руханият басым болатын деңгейіне тәуелді екенін атап айтты. Сондықтан бүгінгі таңдағы рухани қайта өрлеу – ең өзекті міндет. Қазақстанның Үшінші жаңғыруын іске асыру шеңберінде, үш жаңғырту процесі жүзеге асырылатын болады: саяси реформа, экономикалық өрлеудің жаңа моделін құру және қоғамдық сананы жаңғырту. Қазақстан халқының дәстүрлі рухани мәдениетін ілгерілету, мемлекетіміздің рухани тірегі – діннің жалпыға ортақ адамгершілік қағидаларын дәріптеу баршамыздың азаматтық борышымыз саналады, – деді өз сөзінде Қ.Машарипов.
Достық станциясы директорының бірінші орынбасары Еркебұлан Сейсенов осындай ауқымды шараға атсалысқандарға алғыс білдіре отырып, «Рухани керуен» жобасы аясында жоспарланған жұмыстарға табыс тіледі. «Дін – аса мұқияттылықты, терең зерттеуді, биік сауаттылықты, әсіресе, жан тазалығын қажет етеді. Сондықтан осы қасиеттерді халыққа жеткізіп, жетілдіріп отыру керек. Сонда ғана жұрттың дінге деген ұстанымына селкеу түспейтін болады. Осы орайда «Рухани керуен» жобасы азаматтардың діни ұстанымын бекемдеп, дәстүрлі дінге деген көзқарасын қалыптастыруына мүмкіндік береді деп сенемін» деді станция басшысы. Жиын соңында шараға қатысушылар Оpen air стилінде ашық аспан астындағы көрмені тамашалады.