Бірге – таза Қазақстан: «Теміржолшылар» саябағын тазалады

Жалпы республикалық «Бірге – таза Қазақстан» акциясы еліміздің барлық аймағында өткізілуде. Тазалық сақтауды, қоршаған ортамен ізгі қатынас орнатуды, экологиялық мәдениетті қалыптастыруды көздеген кең көлемді шараға теміржолшылар да үн қосуда.

Жуырда «ҚТЖ» ҰК» АҚ қарасты Шу теміржол торабындағы мекемелердің қызметкерлері тайлытаяғы қалмай «Теміржолшылар» саябағында тазалық пен абаттандыру жұмыстарын жүргізді. Бұл күні локомотив пайдалану депосының ма шинистері мен машинист көмекшілері, байланысшылар (ШЧ-35) мен жолшылар (ПЧ-50), энергетиктер (ЭЧ-22) мен станциялықтар және басқа да теміржолшылар басшы-қосшысы түгел осы жерден табылды. Бірлескен еңбектің нәтижесінде тұрғындардың демалыс орны қоқыс қалдығы мен қураған шөп-шалаңнан тазартылып, бордюрлер әктеліп, талдар кесіліп, түптері қопсытылып, тек орындықтар ғана емес, саябақтың ортасында орналасқан екі ескі ескерткіш те сырланды.

Өткен аптада Шу ауданының әкімі Айтақов теміржол мекемелерін аралап, теміржолшылармен кездесуде осы «Теміржолшылар» саябағының күтімі сөз болғанын айтқан болатынбыз. Әкім өз кезегінде саябаққа су келтіру мәселесін шешуге көмектесетінін жеткізген. Бүгін, міне, «көп түкірсе – көл» демекші, көптің атсалысуымен «Теміржолшылар» саябағы ажарланып, көрер көзге жайнап шыға келді. Теміржолшылардың сенбілікке жалпы республикалық акция кезінде ғана емес, ағымдағы айдың басында аталып өткен Көлік қызметкерлері күні қарсаңында да шыққан болатын. Енді олар «Теміржолшылар» саябағының күтімін тұрақты қадағалап отырмақ.

Динара БАТЫРХАЙЫРОВА, Шу