«Үздік маман» атанған Ирина
Ақтөбе жүк тасымалы бөлімшесінде инженер болып қызмет ететін Ирина Краснова жуырда зейнеткерлікке шығады. Көп жылдар бойы бір салада табан тіреп еңбек еткен ол жақында ғана «Үздік маман» атанды. Өмірінің 42 жылын теміржолға арнаған білікті маман тағдырының теміржолда өрілгеніне еш өкінбейді...
Осы Ақтөбе қаласында дүниеге келген Иринаны тағдыры бала кезденақ теміржолмен байланыстырған сыңайлы. Тек теміржолшылар мекендеген тұрғын үйде балалық шағын өткізген Иринаның анасы Краснова Надежда Александровна өмірінің 40 жылын осы теміржол саласына арнаған ардагер еді. Балалық шағын соғыстың зұлмат жылдары ұрлап, 14 жасында теміржол училищесіне оқуға түскен Надежда 1946 жылы станцияға жұмысқа тұрып, зейнеткерлікке шыққанға дейін еңбек етіпті.
– 12-13 жасымда сіңлім Маринамен бірге Ақтөбе станциясында «стрелочник» болып еңбек ететін анамызға еріп барып, бағыттағыштарды май лап жүрдік. Сол кезде маған анамның бағыттағыштарды қолмен ауыстырып, тазалап, тыным таппай жүретіні ұнайтын. Оған көмектесуге тырысатынмын, ұжымдастарының «қандай керемет көмекшің бар» деген мақтауын естіп марқайып қалатынмын. Сол кездің өзінде мен: «Теміржолда жұмыс жасау қандай керемет, өскенде теміржолшы боламын» деп ой түйгенім есімде. Мектеп бітіргенде 17 жаста едім. Теміржолға кәмелет жасына жетпегендерді жұмысқа алмайды. Мен уақытша теміржол ауруханасына жұмысқа тұрып, тіркеу бөлімінде науқастардың картасын толтырып жүрдім. 18-ге толған соң бірден теміржолға ауыстым. Автоматтандырылған есептеу орталығында бірнеше жыл еңбек еткен соң жүк тасымалдау бойынша құжаттарды өңдеу орталығына (ТехПД) ауысып ұзақ жыл еңбек еттім. Сырттай оқуға түсіп, теміржол колледжін «бухгалтерлік есеп және аудит» мамандығы бойынша тәмамдадым, өзімді нағыз теміржолшы ретінде сезіне бастадым, – деп еске алды кейіпкеріміз.
Ирина қай жұмыста да өзінің еңбекке ептілігі мен сауатты маман екенін көрсете білді. Сондықтан басшылық Ақтөбе жүк тасымалы бөлімшесіне транзиттік тасымал есепқисабын жүргізуге ауыстырғанда бұл өзіне көрсетілген үлкен сенім деп қабылдады және сол сенім үдесінен шыға білуге барын салды. Білімін жетілдіріп, ізденіп, үйренуден, оқып-тоқудан жалықпады. Бұл жерде 10 жылға жуық еңбек еткен соң құжат айналымы бөлімінде, сосын құпия әскери жүктерді тасымалдау бөлімінде еңбек етті. Бұдан әрі Иринаның еңбек өтілі тауар кассирі, одан әрі аға тауар кассирі, кейін қазіргі инженер лауазымына ұласып, өз міндетін жоғары жауапкершілікпен атқарумен тек алғысқа ие болып келеді.
– Кез келген жетістікке жеткісі келетін адамда ең бірінші өзіне және жұмысына деген жауапкершілігі жоғары болуы тиіс. Сондай-ақ, атқарып отырған жұмысыңды жақсы көре алмасаң да, ең болмағанда сыйлауға тиіссің. Сонда жұмысың да жақсы жүреді, жемісін де береді. Барлық кезде сен қоғамның бір мүшесі екеніңді ұмытпай, айналаңда жұмысты бірге атқарып отырған әріптестерді сыйлау керегін баса айтқым келеді. Себебі, жалғыз бір адам бөлімнің барлық жұмысын атқару мүмкін емес. Теміржолда жекедара табысқа жету жоқ, тек ұжым болып бірге еңбектенгенде ғана ортақ нәтижеге қол жеткізесің, демек табыс та ортақ. Осы орайда, мені үнемі қолдап келген барлық әріптестеріме ризашылығымды білдіремін. Сондай-ақ, бір жерден екінші жерге үйренісіп кету де оңай емес. Кезінде мені осы салаға келгенде, тәжірибелерімен бөліскен тәлімгерлеріме де алғысым шексіз, – дейді таяуда зейнеткерлікке шығатын Ирина Краснова.
Гүлфайруз ТӨРЕМҰРАТОВА