Шарда саябақ ашылды
Абай облысы бойынша меншікті тілші
Экологиялық акция аясында семейлік теміржолшылар талай игілікті іс тындырды. Өткен апта соңында Семей ЖТ бөлімшесіне қарасты Шар станциясында «теміржолшылар саябағы» салтанатты түрде ашылды.
Шар – ежелден теміржолшылар қоныстанған ірі тораптық станция. Сондықтан сала кәсіпорындары мол шоғырланған станцияның өзіне тән тағлымды тарихы да бар. Өткен демалыс вокзал алдындағы бұрынғы теміржол алаңында жасыл экономикаға негізделген «Қамқор green» жобасы аясында «Kamkor Park» акциясы кең ауқымда аталып өтілді. Аталмыш іс-шараға «Қамқор менеджмент» ЖШС бас директорының орынбасары Әлібек Құлыбаев, «Теміржол жөндеу» ЖШС бас директоры Ескендір Қарсыбеков қатысып, шағын қаланың шырайын арттырып, жасыл желектермен көріктендіру және экологиялық жағдайын жақсартуға негізделген бастамаға сәттілік тіледі. Сондай-ақ, өздері де атсалысып, қылқан жапырақты жасыл өскіндер отырғызуда білек сыбана кірісті.
Акция барысында белсенділік танытқан жергілікті теміржолшылар жаңадан ашылған екі бірдей шағын саябаққа 250 түптен шырша көшеттерін отырғызды. Ендігі аралықта теміржолшылар қаласының ең көрікті орны саналатын осынау саябақты олар өздері күтіп-баптамақ. Аумағы ат шаптырым болатын саябаққа тұрғындар үшін арнайы түрлі-түсті реңдегі сәкілер, көрнекі мүсіндер қойылған. Сондай-ақ, әсем гүлзарлармен көмкерілген. Бұл жұмыстарды атқаруға жергілікті билік өкілдерімен бірге Шар теміржолшылары да жаз бойы белсенді түрде атсалысыпты.