Ақтөбелік жастар қан тапсырды

Ақтөбе темір жолында еңбек ететін жастар қайырымдылық шаралардан тыс қалып көрген емес. Бұл жолы олар «Өзгеге үміт сыйла» акциясына қатысып, өз еріктерімен қан тапсырды. Шара аясында апта соңына дейін 500 адам қан тапсыруға тиіс.

Аталмыш шараның өзі жастардың бастамасымен қолға алынған. Осылай ажал аузында жатқандарға септігімізді тигізсек дейді олар.

«Теміржолшы белсенді жастар денсаулық аптасына атсалысып, қан тапсыру акциясын өткізіп жатырмыз. «Денсаулық – зор байлық» деп бекер айтылған ба, жыл сайын әлемде миллиардтаған адам қан құюға мұқтаж болады екен. Алыстан мысал іздемей-ақ, осы өзіміздің ауруханалар да кез келген уақытта қанға мұқтаж. Біз осы мәселеге тамшылап болса да өз үлесімізді қосқымыз келді. Осындай шараны жылына екі рет өткізіп тұруға тырысамыз. Өткен жылы өткен шараға 300 адам атсалысса, биыл апта соңына дейін 500 адам қан тапсырады деп жоспарлап отырмыз», – дейді Ақтөбе теміржол жастарының жетекшісі Дархан Әнуаров.

Жастар арасында тұрақты донор болып жүргендер де, алғаш келіп жатқандар да бар екен. Дәрігерлер жастарға егер денсаулығы жарап тұрса донор болудың пайдалы екенін, қан айналымы жүйесінің жақсаруы донорлықтың арқасында болатынын түсіндірді. Қызыл жілік майының торшалары мен иммунитеттің стимуляциясының жақсы жұмыс жасауына да донорлық етудің маңызды екені айтылды.

Теміржолшы жастар апта ішінде қан тапсырудан бөлек облыс әкімімен бірге ағаш егу жұмыстарына да атсалысты. Басқа да қаланың қоғамдық өміріне белсене қатысып, теміржол жастарының ауызбіршілігін, тиянақтылығын көрсетті.