Медпойыз «Денсаулық»: Түбекте тәмамдады
Қазан айының басында қарт Маңғыстауға келген «Денсаулық» медициналық пойызы айға жуық уақыт оннан астам бекетке аялдап, түбек халқына қызмет көрсетті.
Маңғыстау теміржолының бойындағы алыс-жақын бекеттер мен станцияларды аралап, сол маңдағы қаншама халыққа сапалы медициналық қызмет көрсеткен «дөңгелек үстіндегі емхана» өткен аптада өз жұмысын аяқтап, сапарын түбектің соңғы нүктесінде тәмамдады. Опорный, Үстірт, Сай-Өтес, №10 бекет, Шетпе, Қарақия, Жетібай, Өзен, Болашақ, Сам, Тұрыш станцияларында 1 немесе 2 күннен аялдап, түрлі се беппен медициналық қызметке қолы жетпей жүрген жергілікті тұрғындардың дертіне шипа болып, алғыс арқалаған ақжолтай пойыздың білікті мамандарына жүгінгендер саны әдеттегіден көп болыпты. «Денсаулық» пойызы бұл сапарында барлығы 400 сағат уақыт бөліп, сол уақытта 3 мыңға жуық адамды медициналық қызметпен қамтыды.
– Бұл пойыз біздің бөлімше аумағындағы жұмысын қазан айының бірінен бастады. Сол күннен бастап «Денсаулық» жылжымалы медициналық кешенінің жұмысына жергілікті халықтан тек алғыс естідік. Сондықтан халықтың, теміржолшылардың, филиал басшылығының атынан осындай мүмкіндік сыйлап отырған ҚТЖ компаниясына және Денсаулық сақтау министрлігіне алғысымызды айтамыз.
«Денсаулық» пойызының басшысы Зүлия Қамиеваға да түбек халқы атынан рахмет айтамыз, – деп медициналық пойыз мамандарының жұмысына алғысын жеткізген Маңғыстау жүк тасымалы бөлімшесі директорының орынбасары Ерлан Бүркітов көрсетілген қызметтің көптің көңілінен шыққанын айтады.