Қарақия халқына қызмет көрсетті
Темір жол бойымен жұмыс сапарын Маңғыстау өңірінде жалғастырып жатқан «Жәрдем» медициналық пойызы облыс орталығынан 80 шақырымдай қашықтықта орналасқан Қарақия станциясына келіп жетті.
Желтоқсанның 7-8 күндері осы станцияда болып халыққа екі күн бойы таңертеңгі 10 мен кешкі 17 аралығында медициналық қызмет көрсетуге кіріскен жылжымалы емхананың жұмысы ә дегеннен жемісті басталды. Негізінен теміржолшылар тұратын Қарақия станциясына тоқтаған «Жәрдем» пойызына станция тұрғындары ғана емес, өзге жақын елдімекендердің халқы да көп келді. Қарақия ауданының және Құрық ауданының бірнеше ауылынан барлығы 350-ге жуық тұрғын, егде жастағылар, балалы ата-аналар көп салалы медициналық қызметтің өз «аяғымен» жеткеніне қуанып, салалық дәрігерлерге қаралып, қажетті кеңестерін алып жатты.
− Станциямызда шағын медициналық пункт бар, дегенмен тұрғындарымыз көбіне толық тексерілуге 10-15 шақырымда орналасқан аудан орталығындағы емханаға барады. Сондықтан станция халқы түрлі заманауи медициналық құрылғыларды, медицинаның түрлі бағыттағы білікті мамандарын бір арнаға тоғыстырған «Денсаулық», «Жәрдем» пойыздарын қашан да асыға күтеді. Осы жолы да талай адам пойыз дәрігерлерінен жан-жақты медициалық көмек алып, денсаулықтарын шыңдады.
Мұның алдында келіп кеткен «Денсаулық» пойызының мамандарына жүгінгендердің қарасы да қалың болған еді. Ол жолы барлығы 425 адам тексеруден өткен. Пойыздарға бар қажеттілік жасалып, жарықпен, сумен, медициналық қоқыстар үшін жәшіктермен қамтылды. Жалпы, медициналық пойыздар бізге қызмет көрсетсе, біз оларға дегендей, бәрі жоғары деңгейде жақсы ұйымдастырылды, – дейді Қарақия станциясының бастығы Абай Зейнелғабитов.
Сонымен «Жәрдем» пойызы бұл станцияға бөлінген екі күнде 295 ересек адамды, 75 баланы қабылдап, тиісті дәрігерлік көмек беріп, әрі қарай Жетібай станциясына жол тартты.