Жобаға енген есім
Ұлттық компанияда биылғы Жастар жылына орай «ҚТЖ-ның 100 жас есімі» жобасы іске қосылды. Сол тізімге енген жастардың бірі – Атбасар белгі беру және байланыс дистанциясының байланыс диспетчері Әсем Қоласбаева.
Теміржолда 10 жылдан бері еңбек етіп келе жатқан ол – өз ұжымында өте белсенді қызметкерлердің бірі. Кәсіби біліктілігіне қоса қоғамдық және компанияның жастар саясатын жүзеге асыру шараларына үздіксіз атсалысады. Бұл форумға екінші рет қатысып отыр. Бірінші рет 2013 жылы 26 жасында «Жас үздік диспетчер» атағы бойынша марапатталған екен.
– «Жүз жас есім» жобасының шарттарына сай барлық тапсырмаларын орындадым. Үш жүзден астам жас теміржолшы қатысқан үлкен байқау болды. Онда 2 минутта өзіңді өзің таныстырасың. Соның барысында осы уақытқа дейін қандай жетістіктерге жеткеніңді, өзің туралы қандай газеттерге шыққанын, қандай марапаттар алып, не өнерің бар екенін айтасың. Анкета толтырасың. Сол қатысқан көп жастың ішінен бізді таңдады. Байқау үш кезеңнен тұрды, екіншісі бейнеконференциямен 1 сағат сөйлестік. Қалай жауап бергенімізге, жұмысымызды қаншалықты білетінімізге қарады. Ситуациялық жағдайларға қаншалықты жауап бере алатынымызды көрді. Сол сынақтардың бәрінен ойдағыдай өттім, – дейді «Жүз жас есімнің» бірі Әсем.
Әсем – бүгінде екі баланың анасы. Қазақстан теміржолында жастар қатарына жататындар жасын 29-дан 35-ке ұзартқандықтан, ол өз мүмкіндігін байқап көруді ойлаған. Жолдасы да осы салада, Атбасарда локомотив шаруашылығы бойынша шебер болып жұмыс істейді. Әсемнің айтуынша, бұл тізімге кіріп, атағын алып, белгісін тағып алған соң шаруа бітпейді. Алдағы уақытта олар үнемі қатаң бақылауда болады. Ай сайын өздеріне бөліп тастаған өкілдер олардың болашақта дамуына көмектеседі. – Біз осымен қалмауымыз керек. Компаниямыздың, жастардың ұраны «Благо» болғандықтан біз игі істерімізбен көріне беруіміз қажет. Бірінші кезекте, әрине, ол адамдардың қауіпсіздігін қамтамасыз ету, сыбайлас жемқорлыққа ешуақытта жол бермеуге тиіспіз. Осы атқа лайықты болуымыз керек. Кейінгі жастарға да айтарым – компаниямыз ұйымдастырып беріп отырған осындай форумдарға қатысып, өздеріңізді көрсетуге ұмтылыңыздар. Сонда ғана өсіп, дамисыздар. Бәрі өз қолдарыңызда дегім келеді, – дейді ол.