Коронавирустың алдын алу мақсатында "Ауруға жол жоқ!" атты акция өтті
«Қазақстан теміржолшысы» газетінің тілшісі
Достық станциясының бір топ ерікті жас теміржолшысы Қытай елінде пайда болған коронавирустың алдын алу мақсатында "Ауруға жол жоқ!" атты акция өткізді.
Қытаймен шекаралық станция үшін көрші елде бұрқ ете қалған тәж вирусы қаншалықты қауіпті екені айтпаса да түсінікті.
Акция барысында станцияда іссапарда жүрген қытайлық теміржолшыларға, осы азаматтармен тікелей жұмыс жасайтын Достық кедені, "Кедентранссервис" АҚ және әскери күзетші қызметкерлеріне түсіндіру жұмыстары жүргізіліп, арнайы плакаттар, медициналық маскалар таратылды.
Еріктілер тобы өз қаржыларына 70-80 маска алып, 27 қаңтар күні ауысымда болған станцияның теміржолшыларына таратты. Бұл істі басшылық та қош көріп, қолдау танытып, жұмыс барысымен көрші елге барып-келіп жүретін теміржолшыларға маскалар таратып беруде.
– «Сақтықта қорлық жоқ» демекші, бұл жақта ешқандай қауіп жоқ болса да, станция қызметкерлері бүгінде толықтай маска киіп отырады. Ал жүк тасымалы әдеттегідей үздіксіз жүріп, жұмыс тоқтамай атқарылып жатыр, – дейді еріктілер тобының мүшелері, жас теміржолшылар Батыржан Ахметжанов пен Данияр Бимашев.