Әлеуметтік қолдауға – 5 млрд теңге
«ҚТЖ-Жүк тасымалы» АҚ Ұжымдық шарт шеңберіндегі міндеттемелерді орындауға өткен жылы 5 млрд теңгеге жуық қаржы бағыттаған. Бұл туралы қоғамның баспасөз қызметі мәлімдеді.
Аталған компанияға білікті және кәсіби кадрларды тарту және оларды ұстап қалу үшін Ұжымдық шартта жұмысшыларға арналған әлеуметтік пакет қарастырылған. Әлеуметтік жеңілдіктер қатарына темір жол көлігімен жүру ақысын төлеу, зейнетке шығып жатқандарға бір реттік жәрдемақы, мерейтойлық даталарға байланысты, баланың туылуы және жерлеуге, мектепке баратын 3 немесе одан көп баласы бар отбасыларға, ерекше балалары бар қызметкерлерге материалдық көмектер беру сынды жеңілдіктер жатады.
Теміржолшыларға қазақстандық емдеусауықтыру орындарына, санаторий-профилакторилерге жолдамалар ұсынылады. Бұл ретте жұмысшы жолдама құнының тек 10 пайызын, ал қалғанын жұмыс беруші төлейді. Теміржолшылардың мектеп жасындағы балалары жазғы сауықтыру орталықтары мен лагерьлерде денсаулықтарын шыңдап, каникулдарын өткізеді.
Локомотив бригадалары 57 жасқа келген соң демалысқа жіберіліп, зейнеткерлік жасына келгенге дейін салалық жәрдемақы ала алады. Бүгінгі таңда осы мүмкіндікті 2 мыңнан астам адам пайдаланып отыр. Жыл сайын қоғам барлық локомотив деполарына салалық жәрдемақы беруге 2,2 млрд теңгеден астам қаржы бөледі.
2020 жылы сондай салалық жәрдемақы алатындар қатарына тағы 320 машинист пен олардың көмекшісі қосылады деп күтілуде. Тиімді және өнімді еңбекке ынталандыратын міндеттемелерді қамтамасыз етуге Ұжымдық шарт бойынша қаржы көлемі де арттырыла бермек. Тек осы жылдың өзінде ғана әлеуметтік төлемдерге 8,7 млрд теңгеден астам қаржы бөлу жоспарлануда.
Ұжымдық шартта қарастырылған жеңілдіктер мен кепілдемелер және өтемақылардың көп бөлігі теміржолшыларға еңбек заңнамасында келісілген деңгейден тыс ұсынылатын болады.