Ауған алауы жадымызда
Абай облысы бойынша меншікті тілші
Семей ЖТ бөлімшесінің теміржолшылары кеңес әскерінің Ауған жерінен шығарылған тарихи күнге ерекше мән береді. Өйткені, жергілікті теміржолшылар арасында ауған соғысының ардагерлері көп.
Бұл күннің құрметіне жыл сайын бөлімшеде түрлі шаралар ұйымдастырылып, кездесулер, мұражайға экскурсиялар өткізіледі. Осындай шараларға бастамашы болатын Теміржолшылар кәсіподағының Семей өңірі бойынша өкілі Алик Досанов басқаратын кәсіподақ ұйымы биыл да ақпанның 15-жұлдызында салтанатты шара ұйымдастырды. Оған ауған соғысының ардагерлері арнайы шақырылып, жас ұрпаққа отты жылдардан естелік айтып, бейбіт өмірдің қадыр-қасиетін бағалауға шақырды.
– Қазіргі таңда Семей теміржолы бойынша 27 ауған соғысының ардагері еңбек етуде. Олардың жас буын арасында патриоттық рух қалыптастырудағы қосып жүрген үлестері зор. Сол азаматтардың көмегімен Түрксіб-Семей мұражайынан арнайы мүйіс те ұйымдастырдық. Танымдық-тағылымдық бағыттағы шаралар да жиі өткізіледі, – дейді өзі де ауған алауын бастан кешкен Алик Тұрсынұлы.
Ауған соғысының ардагерлері ұйымы патриоттық бағыттағы атқарған жұмыстары үшін кәсіподақ төрағасы Алик Тұрсынұлына Алғыс хат табыс етті. Сонымен қатар, жыл сайын назардан тыс қалдырмайтын Семей ЖТ бөлімшесі басшылығына да ілтипаттарын білдірді.