Теміржолшылар екі күннің ішінде 500 машина қар шығарды

Өткен аптаның тек бейсенбі мен жұма күндері 1500 теміржолшы елорда көшелерінен 500 машина қар шығарды. Қармен күрес жұмыстары «Өндіріс» тұрғын алабы, «Агроқалашық» шағын ауданы және Қырқыншы станциясының көшелерінде өтті.

20-21 ақпанда өз еріктерімен қар тазалауға шыққан теміржол қызметкерлері көшелер және тротуарларды ғана емес, сонымен бірге зейнеткерлер мен жалғыз тұратын қарттардың да аулаларын қыс бойы сіресіп жатқан қалың қардан тазалап берді. Бұл күндері қар тазалау құралдарымен «қаруланған» ұлттық компанияның Орталық аппараты мен «ҚТЖЖүк тасымалы», «Жолаушылар тасымалы», «Қазтеміртранс», «KTZ Express» және өзге де еншілес ұйымдарының басшыларынан бастап қатардағы мамандарына дейін «ҚТЖ 2020 қайырымды іс» бағдарламасы аясындағы қар тазалау бойынша челленджге үн қосты. Жұмысқа 50-ден астам арнайы техника күші жұмылдырылып, шамамен 6 км жол, жүздеген аула, №29 мектептің аумағы тазартылып, КамАз көлігімен без жүзден аса рейс қар шығарылды.

– Ақпан айының өзінде Нұр-Сұлтан қаласында жауын-шашынның екі айлық нор масы түсті десе болады. Көптеген адамдардың өз ауласынан осыншама ауқымдағы қарды шығаруға күші де, техникасы да жетпейді. Оларға көмек қолын созбай отыра алмадық. Теміржолдағы жұмыс кестесінің тығыздығына қарамастан осындай жақсы істерге қашан да уақыт табуға болады, – деді Магистральдық желі дирекциясының директоры Бауыржан Орынбасаров.    

Қала маңында тұратын тұрғындар ерікті теміржолшыларға дән риза. Қалалық коммуналдық қызмет жұмысына айтарлықтай үлес қосып жатқан оларға алғыстарын жаудыруда. Теміржолшылардың бұл бастамасы Еріктілер жылында тіпті де орынды болғанын олардың қармен күреске арнаған екі күнгі жұмыс ауқымы көрсетті. Теміржолшылардың «ҚТЖ 2020 қайырымды іс» бағдарламасы аясындағы қар тазалау бойынша челленджі тек елордада ғана емес, аймақтарда да кеңінен қолдау табуда. Қазақстанның әр түкпірінде теміржолшылар осындай акцияларды өткізіп, Еріктілер жылына өз үлестерін қосуда.