Байқауға жолдама алды
«Ел іші – өнер кеніші» демекші, талай таланттарды тудырған Маңғыстау өңірінің теміржолшылары арасында да өнерлі жандар аз емес. Жуырда сондай сегіз қырлы, бір сырлы теміржолшы мамандардың өнерін тамашалап, таланттарына тамсандық.
Наурыз мерекесіне орай «ҚТЖ» ҰК» АҚ ұйымдастыруымен Нұр-Сұлтан қаласында өтетін «Дара жол таланттары» байқауына Маңғыстау жүк тасымалы бөлімшесінде қазылар алқасының қатысуымен іріктеу өтті. Онда түбек теміржолының түрлі бағытында еңбек етіп жүрген біраз адам өнер көрсетіп, бақ сынады. Олардың арасынан Бейнеу станциясынан Жандаулет Қилыбаев, Маңғыстау машинисі Қайсар Азаматов, Маңғыстау станциясы еңбек қорғау инженері Айгүл Аяпова, жетібайлық жол монтеры Бауыржан Тәжіков, Бейнеу станциясынан белгі беру және байланыс дистанциясының электромеханигі Мұрат Жаулыбаев, Өзен вагондарға техникалық қызмет көрсету пунктінің вагон қараушы-жөндеушісі Азамат Ыбраев, Маңғыстау станциясынан Ержан Ниязқұлов, Маңғыстау магистральдық желі бөлімшесінен Сұңғат Тәжиев, Ильясовтар отбасылық ансамблі және Өзен станциясынан Бердібек Мамутов, Бейнеуден Бексұлтан Икенов, Қайрат Қожанов үздік өнерлерімен ерекшеленіп, іріктеуден өтті. Олардың бірі өзінің шығармасын орындаса, енді басқалары ән айтып, күй шертіп, түрлі аспаптарда ойнады. Төрешілер шешімімен Ильясовтар ансамблі, Бексұлтан Икенов, Жандаулет Қилыбаев, Қайрат Қожанов, Бауыржан Тәжіков, Мұрат Жаулыбаев елордадағы өнер додасына жолдама алды.
− Осыған дейін өнерлі теміржолшылардың басын бүгінгідей қосқан емеспіз. Бүгін көріп сүйсініп отырмыз. Олар өз саласының ғана маманы емес, бір-бір өнердің иесі екен. Қазір сайыс барысында домбыра тартатын теміржолшылардың көп екенін байқап, болашақта неге домбырашылар ансамблін құрмасқа деген ой келді. Алдағы Наурыз мейрамдарына сол ойымызды іске асырамыз. Барлығына бірдей киім тіккізіп, Маңғыстау теміржолынан әдемі бір ансамбльдің тұсауын кесеміз, – деді Маңғыстау теміржолшылары кәсіподағының төрағасы Әзірбай Тұрмағанбетов.