Қайырымды қарттарға жасайық...
Ақтөбе облысы бойынша меншікті тілші
Төтенше жағдай кезінде еріктілер жұмысы жандана түскені құптарлық жайт. Қиындыққа тап болған жандарға әлеуметтік көмек көрсетуге асыққан жандар қатары көбейгені қуантады.
Қандыағаш станциясы, локомотив пайдалану депосы, вокзал, жолшылар, белгі берубайланыс, электрмен жабдықтау т.т. салалық мекемелер арасынан жиырмаға жуық жас іріктеліп шығып, еріктілер тобын құрған. Олар мүмкіндігінше қайырымдылық шараларын жиі ұйымдастыруда. Теміржолшы жастар бұл жолы депо жұмысшыларына, машинистерге елде тараған індеттің алдын алу мақсатында бетперделер таратты және үйден шыға алмай қалған бірнеше қарт кісіге азық-түлік жеткізіп берді.
«Әр бөлімшеден құралған ерікті жастар өз қалталарынан ақша жинады. Жеке тігін шеберханасына бетпердеге тапсырыс бердік. Деподағы әріптестеріміздің жұмысы тоқтаусыз. Бетперде үнемі керек. Олар біздің сыйлығымызға қуанып, алғыстарын жаудырды. Бүгінгі күні бір жапырақ шүберектен тігілген бетперде бағалы сыйлыққа айналды. Бетпердеге қажеттілік әлі де өзекті болатынын түсінеміз. Сондықтан ендігі жерде мата сатып алып, оны өзіміз тігуді жолға қоймақпыз», – дейді жас теміржолшы Жазира Әуесова.
Кеше жастар станцияда еңбек еткен зейнеткер Нина Матрахованың шаңырағына барды. Қария екі аяғынан жүре алмай қалған. Үйге қажетті тұрмыстық заттар және азық-түлік алып келген ерікті жастарға алғыстан басқа айтары жоқ. Жас теміржолшылар «Қайырымды қарттарға жасайық!» деген ұранмен бұл бағыттағы жұмыстарын жалғастырмақ.