Тарихтың тірі кейіпкерлері

Ақтөбе ЖТ бөлімшесінің қызметкерлері «Жеңіске – 75 қадам» жобасын жүзеге асыруды бастады. Жобаның мақсаты - соғыс және тыл ардагерлеріне тұрақты түрде қамқорлық көрсету.

Азық-түлік себеттерін арқалаған теміржолшылар жыл бойы тарихтың тірі кейіпкерлеріне айналған соғыс жауынгерлерін қамқорлыққа алу жобасына кірісті. Жобаның Ақтөбе облысындағы үйлестірушісі, теміржолшы Руслан Жұмағалиев Ақтөбе ЖТ бөлімшесінің басшысы Бөріхан Беркімбаевтың тапсырмасы – ең бірінші кезекте ардагерлерге қолдан келгенше қамқорлық-көмек жасау екенін жеткізді. "Жыл соңына дейін облыстағы 45 ардагердің әрқайсысының үйіне кем дегенде төрт реттен барамыз. Бұл жолы 10 ардагердің үйіне азық-түлік себеттері мен тұрмысқа қажетті заттар жеткізіп бердік"; – дейді ол.

Республикалық әлеуметтік-қайырымдылық жобасы ел аумағында 2015 жылдан бастап ұйымдастырылып келеді. «Жеңіске – 75 қадам» жобасы Ұлы Отан соғысының ардагерлеріне атаулы көмек көрсетуді көздейді. Жоба аясында соғыс ардагерлерінің теміржол көлігімен тегін жүруі ұйымдастырылып, қарт майдангерлерге барлық категориядағы пойыздардың купе вагондарынан орын бөлінеді. Сапар барысында олардың барлық жағдайын жасап, тегін тамақпен қамту да қарастырылған. Ақтөбелік еріктілер сонымен қатар, әлеуметтік жағынан әлсіз топқа жататын теміржолшылардың шаңырағына да көмек көрсетіп, көп балалы және мүгедек бала өсіріп отырған бірнеше отбасыға азық-түлік таратып, көмек берді.