Қайырымдылық эстафетасы - Өзенде
Маңғыстау облысы бойынша меншікті тілші
Маңғыстау жүк тасымалы бөлімшесіне қарасты Өзен станциясының ұжымы өткен аптада қабылдаған «Жақсылық жасап жарысайық!» ізгілік эстафетасын жалғастырды.
Станция қызметкерлері Жаңаөзен қаласында тұратын жағдайы төмен отбасыларға азық түлікпен көмектесті.
«Көп түкірсе – көл» демей ме, станция қызметкерлері бірігіп төтенше жағдайға байланысты табысынан айрылып, тарыққан отбасыларға қолдан келгенше көмектесу ниетінде қаражат жинадық. Бірнеше отбасын қажет тамақтармен қамтамасыз еттік. Бұл да Рамазан айына байланысты жасалған сауапты істің бірі. Еліміздегі қазіргі қысылтаяң шақтан осылай бірігудің, белгіленген тәртіпті сақтаудың арқасында шығамыз, – дейді бұл туралы ақпарат берген Өзен станциясы бастығының орынбасары Самал Зулпыхаров.
Оның айтуынша, өзендіктер қазіргі жағдай кезінде өзгелерге көмек қолын созып қана қоймай, төтенше жағдайдың ережесіне қатаң амал қылып, жергілікті әкімдікпен бірлесе біраз іс шараларды атқаруда екен.
Станцияда қашықтықтан оқыту жұмыстары жүруде, техникалық сабақтар онлайн түрде өтуде. Күнделікті таңертеңгі және кешкі жоспарлау жиындарында қызметкерлердің бетперделері, антисептиктері, қолғаптарының болуы басшылықтың қатаң қадағалауында екен. Жұмысшыларға антисептик, маска, тағы басқа гигиеналық құралдары Маңғыстау жүк тасымалы бөлімшесінен жеткізілуде.
− Бүгінде станцияның жұмысы бірқалыпты. Теміржолшыларымыз атышулы індеттен аман. Cтанция ұжымы төтенше жағдайға байланысты қалалық әкімдікпен тығыз қарым қатынаста жұмыс жасауда. Беймезгіл кезде, жұмыстан тыс уақыттарда адамдардың теміржолда болмауын бірлесе қадағалаудамыз, – дейді Самал Зулпыхаров.