«COVID, тоқтат!»: сурет салып, сыйлық алады
Ақтөбе облысы бойынша меншікті тілші
1 маусым – Халықаралық балаларды қорғау күніне орай ақтөбелік теміржолшылардың балалары сурет салудан жарысты бастады. 8 және 12 жас аралығындағы жасөспірімдерге арналған байқау онлайн өтеді.
Байқауды Ақтөбе жүк тасымалы және магист-ральдық желі бөлімшесінің кәсіподақ комитеті ұйымдастырып жатыр. Өңірдегі теміржолшылардың сурет өнеріне бейім балалары онлайн түрде жарысқа қатысады.
«Балалар мерекесіне орай ұйымдастырылып жатқан сайысқа 8-12 жас аралығындағы балалар қатысады. Негізінен патриоттық тақырыпқа көңіл бөлініп отыр. Сол үшін де бүлдіршіндерге «Менің Отаным – Қазақстан» және «COVID, тоқтат!» тақырыптары берілді. Бала қиялы ерекше көрінген суреттер оншақты күнде іріктеліп, үздіктер марапатталатын болады. Карантин жағдайына байланысты балаларды жинай алмадық. Сол үшін де байқау онлайн түрде өтеді», – дейді кәсіподақ ұйымының төрағасы Самат Әлиев.
Баланың көңілін өнермен, біліммен аулау көкейкесті болып тұр.
Туындыда бейнелеу өнерінің кез келген техникасын: көркем сурет, графика, аппликация, коллаж пайдалануға болады.
Қиялы ұшқыр, қаламы жүйрік балапандар бағалы сыйлықпен марапатталады.