Бейнеуде теміржолшылар арасында спорттық жарыс өтті
Маңғыстау облысы бойынша меншікті тілші
Жақында Бейнеу станциясындағы теміржолшылар тоғызқұмалақ пен қол күресінен жарыс өткізді. Спорт нұсқаушысы ұйымдастырған бұл сайысқа бейнеуліктерден бөлек Құрық портынан да қатысушылар келді.
Бейнеу теміржолшыларының спорт нұсқаушысы Бекзат Нұралиев білекті де жүректі жігіттерді жинаған қол күресі екі түрлі салмақ бойынша тартысқа толы, жоғары деңгейде өткенін айтты.
– Бізде тепсе темір үзетін мықты жігіттер баршылық. Қыз-келіншектеріміз де осал емес, спортпен үнемі шұғылданатын, бір басы бірнеше спорт түрінен озат, барған жарысынан бос қайтпайтын нәзік жандар да аз емес. Бұл жолы ерлер қол күресі мен тоғызқұмалақтан сынға түсті. Жеңіске жеткен де, жетпеген де риза тамаша ойын болды, – дейді спорт нұсқаушысы.
Жарыс қорытындысы бойынша қол күресінен 80 келі салмақ дәрежесінде күш сынасқандар арасында Құрық портынан келген Мейрамбек Арқалықов бірінші орынды жеңіп алды. Бейнеу жол дистанциясының жолшылары Азамат Байжанов пен Сүндет Бердібай 2 және 3-орынды иемденді. 80+ келі салмақ дәрежесінде Бейнеу жол дистанциясының жолшысы Бекболат Дүйсеновке тең келер ешкім болмады. 2 және 3-орынға Бейнеу айналым депосының жігіттері Бақытжан Қожамұратов пен Ринат Орынбасар лайық деп танылды.
Тоғызқұмалақ жарысында құмалақтарды ұяшықтарға үйлестіре бөлуден алдына жан салмаған Маңғыстау вагон пайдалану депосынан Нұржігіт Мәліков асқан шеберлігімен топ жарды. 2-орынды Жайлау Жалғасбаев алса, 3-орын Құрық портынан келген Серік Балтабайұлына бұйырды.