Қауіпті өткелге рейд жүргізілді

Жаяу жүргіншілер мен иесіз малдан теміржолға келетін қауіптің алдын алу теміржолшылар үшін ең өзекті мәселеге айналғалы қашан. Жуырда Қызылордада «Бақытты отбасы» партиялық жобасы аясында Теміржол филиалының ұйымдастыруымен Қызылорда жол дистанциясы және Қызылорда станциясының ЖПб қызметкерлерінен құрылған топ кезекті рейдке шықты.

Олар талай жылдан бері айта-айта ауыз талып, жаза-жаза жауыр болған тақырып – қала бойынша ең қауіпті аумақ саналатын КБИ-Шұғыла мөлтек ауданы тұсындағы ескі теміржол өткеліне жиналды. Бұл аумақ теміржолдың 2824 шақырымы, жолдың екі бетіне тұрғындар тығыз қоныстанған және осы аудандағы мектеп оқушылары жолдан өтіп, мектепке қатынайтын, қысқасы, қозғалысы қарқынды, сонысымен өте қауіпті аумақ.  

Рейдке шыққандар мөлтек аудан тұрғындарына, мектеп оқушыларына жолдан өту ережесін түсіндіріп, жазатайым оқиғалардан сақтандырды. Ата-аналарға балаларға абай болып, қараусыз жібермеу, әсіресе түнгі мезгілде жалғыз-жарым жүрмеуін қадағалау ескертілді. Қала тұрғындарының көбейе түсуі, балалардың мектепке оралуы жағдайды тіпті қиындатуда. Бүгінде бұл жолдан күніне шамамен 600 адам, арасында мектепке қатынайтын балалар да бар, осы өткел арқылы бір жақтан екінші жаққа қарай қатынауда. Сондықтан теміржолдың осы тұсына жаяу жүргіншілерге арналған көпір салу мәселесі сөз болып келе жатқалы да талай жыл.  

– КБИ-Шұғыла мөлтек аудандары тұсындағы теміржол бойына көпір салынатын орын Қызылорда бөлімшесі өкілдерінің қатысуымен белгіленіп, тиісті мекемелермен техникалық шарт әзірленген. Алайда  аталған жоба ілгері баспай тұр және қай кезде жүзеге асырылатынын дөп басып айту қиын болып тұр, – деді «Аманат» партиясы Теміржол филиалының Атқарушы хатшысы Базара Танбаева.  

Қалай дегенде де осы өткел адам өміріне қауіп төндіріп тұр. Аса қауіпті аймақтан өтіп жатқан халықтың да сабыры таусылған сияқты. Көпшілігі рейд жүргізушілерді тыңдамай, қолдарын бір сілтеп кете баруда. «Бізге не дейсіңдер енді, қауіпті болса көпір салмайсыңдар ма...» деп дүрсе қоя бергендер де табылды.  

– Шынын айтсақ, осы өткелдегі жүйесіздіктің жеделдете шешілуін біз де қалаймыз. Біздің жұмысымыз – жолдың бабын жасау, алайда осы өткел тұсында таңертең және кешкілік кезекшілік жасауға мәжбүрміз. Енді мектептерде сабақ басталған кезде таңертең, түсте және кешке жолды ретті-ретсіз кесіп өтетіндер көбейеді. Осылай, қысы-жазы біздің жұмысымыз өткел күзетшісіне айналады, – деп шағымданды жол шебері Мақсат Абдраманов.