Алға станциясында жұмыс қызып тұр
Ақтөбе облысы бойынша меншікті тілші
Ақтөбенің Алға станциясы – алты жолаққа тармақталған жолы бар, инфрақұрылымы жақсы дамыған көне станцияның бірі. Күретамыр магистральдың бойында жатқан шағын станция арқылы жүк және жолаушылар пойыздары ағылып жатыр.
Станциядан тәулігіне 25-30 жұп пойыз өтеді, бірнеше жолаушылар пойызы аялдайды.
Қазір станция іргесінен салынып жатқан автожолға тас, тағы басқа құрылыс материалдарын жеткізу жұмыстары қызып тұр. Халықаралық маңызы бар жолдың Бестамақ-Қандыағаш учаскесіне қиыршық тас түсіру қызу жүріп жатыр. Айына 600- 700 вагон жеткізіледі.
«Алдағы жылы да станцияда жұмыс көлемі артады деген болжам бар. Қытайлық фирма станция басынан цемент зауытын салуды қолға алды. Қазір жерін дайындау жұмыстары жүріп жатыр. Іске қосылған кезде шамамен тәулігіне 50 вагон жүк тиелетін болады. Бізге де жаман емес, жұмыс көлемі артып, қызметкерлер саны да көбеюі мүмкін», – дейді станция бастығы Аян Жылқайдаров.
Станцияның тарихы 1908 жылдан басталады. Қазақ жеріне тартылған темір жол тарихымен қатар жасасып келе жатқан станцияға жақын кезінде химиялық зауыттар болған екен, өнімдері осы станциядан тиелген. Қазір станция химиялық зауыттардың қалдықтарын тасумен де айналысады. Жеке фирмалар қалдықтарды вагонға тиеп, цемент зауыттарына өткізіп отыр. Заманауи жетістіктер елімізде қалдықты өңдеу жұмыстарын да жолға қойып отыр.
– Ол ол ма, кезінде Қазақстанды спиртпен қамтамасыз еткен зауыт та осы станцияда болды. 2013 жылдан бері жұмысы тоқтаған зауытты қазір қайта іске қосу қолға алынған. Зауыт басшылары алдағы жылдары іске қосылатын зауыт өнімін темір жол арқылы тасымалдауға ниетті екендерін білдіріп отыр, – дейді станция бастығы.
Алға станциясының бастығы Аян Жылқайдаров теміржолшылар отбасынан шыққан. Еңбек жолын Бестамақ станциясына пойыз құрастырушы болып бастап, станция кезекшісі, пойыз диспетчері сынды еңбек жолынан өтіп барып, 2010 жылы станция бастығы болып тағайындалды.
Алғада еңбек ететін елу шақты теміржолшының он шақтысы станцияда жұмыс істейтін қозғалыс саласының мамандары, қалғаны жолшылар, электромеханиктер, т.б. салада тер төгуде.