Ғасыр жасаған ғимарат
Арыс қаласында іргетасы 1900 жылы қаланған ғимарат мызғымай берік тұр. Бүгінде қалалық музей орналасқан ғимарат Орынбор – Ташкент темір жолы тартылған тұста салынып, Арыс станциясы бастығының қонысы болыпты.
Кейіннен ғимаратта Андреев атындағы жеті жылдық мектеп, №21 теміржол мектебі, 1954 жылдан бастап жұмысшы жастардың кешкі мектебі, жол-техникалық мектеп, музыка мектептері жұмыс істеп, 2001 жылдан бастап «Арыс қаласының музейі» мемлекеттік коммуналдық қазыналық кәсіпорны қарамағына берілген.
Музей – өткен дәуірдің мәдени және рухани, құнды мұраларын келер ұрпаққа, көпшілікке таныстырып, насихаттау қызметін атқаратын, өткенді бүгінмен, бүгінді болашақпен жалғастырушы тарихи орын десек, теміржолшылар қаласындағы жәдігерлер орны бұл миссиясын абыроймен атқарып отырғанына талас жоқ. Музейде көне Арыс тарихы, қазақ даласына тартылған теміржолдың қалыптасу кезеңдері, теміржол саласына еңбегі сіңген тұлғалар, Ұлы Отан соғысы жылдарындағы Арыс станциясы, этнография, көрме залдары бар. Жоспарға сәйкес мұражайда экспозициялық жұмыстар, әдістемелік жұмыстар, іс-шаралар, көрмелер, дәрістер, саяхаттар ұйымдастырылады.
Музей директоры Сарбасова Айгүл Әбдірайымқызының айтуынша, музей айына 800-900 адам, жылына 10 000 жуық адамға қызмет көрсетеді. «Арыс тарихын сөз еткенде теміржол алдымен айтылады. Себебі, жергілікті халық 120 жылдан бері теміржолмен біте қайнасқан, мұнда негізгі кәсіп те теміржолшы. Осы тұрғыдан алғанда біздің музей теміржол бойындағы ең көне ғимаратта орналасуының өзінде ерекше бір заңдылық бар сияқты», – дейді музей басшысы.
Анықтама:
Арыс қаласының музейі орналасқан ғимараттың іргетасы 1900 жылы қаланған. 2001 жылы қазан айының 6 жұлдызында облыс әкімі Б.Сапарбаевтың №191 қаулысымен Арыс қаласының мұражайы болып құрылды.
«Арыс қаласының музейі» мемлекеттік коммуналдық қазыналық кәсіпорнында қазіргі таңда, штат саны 10 адамды құрайды. Шығармашылық қызметкерлер саны 5 адам. Мекеменің материалдық-техникалық базасының жай-күйі орташа.
