TGV-M жүрдек пойызы 2026 жылдың қыркүйегіннен жолаушыларды таси бастайды
Францияның Ұлттық теміржол компаниясы (SNCF) үшін Alstom кәсіпорны құрастырған TGV-M екі қабатты жоғары жылдамдықты пойыздары Еуропалық теміржол агенттігінен (ERA) пайдалануға беру рұқсатын алды. Тиісті өтінім ERA-ға 2025 жылдың желтоқсанында жолданған, ал пойыздарды Францияда сынақтан өткізу жұмыстары 2023 жылдан бері жүргізіліп келеді. Содан бері олардың жалпы жүріп өткен қашықтығы шамамен 1 млн шақырымға жетті, деп хабарлайды Rail-news.kz.
Алғашқы екі TGV-M пойызы маусым айында SNCF құрамына кіретін SNCF Voyageurs жолаушылар операторына табысталады. Тамыздың аяғына қарай олардың саны 6-ға, ал 2026 жылдың соңында 13-ке дейін артады. Бұл пойыздарды TGV INOUI брендімен коммерциялық мақсатта пайдалану 2026 жылдың қыркүйегінде басталады, оған дейін SNCF Voyageurs оларды тәжірибелік-сынақ ретінде жүргізеді.
Жаңа буындағы TGV-M жоғары жылдамдықты пойыздары SNCF Voyageurs және Alstom компанияларының тығыз ынтымақтастығымен әзірленген. Екі компания бұл пойыздардың ішкі интерьер дизайнын 2025 жылдың наурызында таныстырды.
Жаңа модельдің басты артықшылығына келсек, әр пойызда 740 отыратын орын бар (бұл алдыңғы буындағы пойыздармен салыстырғанда 20%-ға көп). Жүк қоятын орын 20%-ға кеңейтілген. Пойызға техникалық қызмет көрсету шығындары 30%-ға азайған.
Жақсартылған аэродинамика мен тиімді тартқыш жетектің арқасында энергия тұтыну көлемі 20%-ға қысқарыпты.
SNCF Voyageurs операторы жалпы саны 160 дана TGV-M пойызына тапсырыс берген. Оның ішінде Ла-Манш бұғазы астындағы тоннель арқылы тасымалдауды жүзеге асыратын Eurostar еншілес компаниясы үшін 30 данасы (және тағы 20-сын сатып алу мүмкіндігімен) қарастырылған.
2026 жылдың сәуір айында Alstom компаниясының Ла-Рошельдегі зауытында Францияның жоғары жылдамдықты тасымал нарығында SNCF Voyageurs-пен бәсекелесуді көздеп отырған Velvet жеке француз операторы үшін Avelia Horizon тобының алғашқы пойызы көрсетілді.