ҚТЖ алаңында көмір тасымалдау мәселелері талқыланды
«Қазақстан темір жолы» ҰК» АҚ-да алдағы жылыту маусымына көмір тасымалдауды қамтамасыз ету мәселелері бойынша кеңес өтті, деп хабарлайды Rail-news.kz.
Кеңеске ҚР Энергетика министрлігінің, «Самұрық – ЭНЕРГО» АҚ, көмір өндіруші кәсіпорындардың, елдің жылу электр орталықтарының, облыстар мен республикалық маңызы бар қалалар әкімдіктерінің өкілдері қатысты.
ҚТЖ көмір тасымалдауды қамтамасыз етуге дайындығын растады, сондай-ақ Қазтеміртранс вагондар паркін іске қосу жоспарларын ұсынды. Дәстүр бойынша ҚТЖ-да жедел штаб жұмыс істейді, тасымалдарды үйлестіру бойынша арнайы диспетчерлер анықталды.
Жаңа жылыту маусымына дайындық басталғаннан бастап (2023 жылғы мамырдан 24 шілдеге дейін) Қазақстан бойынша теміржол көлігімен 14,4 млн тонна көмір тасымалданды. Оның ішінде еліміздің жылу электр орталықтарына 13 млн тонна, тұрғындар үшін 1,4 млн тонна жеткізілді.
Қазіргі уақытта көмір разрездері өтінімдердің және ЖЭО тарапынан көмір үшін төлемнің болмауына байланысты тиеуді толық қуатында жүзеге асыра алмай отыр. Энергетикалық көмірдің негізгі жөнелтімі «Богатыр Көмір» ЖШС разрезінен жүзеге асырылуда. Ағымдағы жылдың шілдесінде 30 маршруттың техникалық мүмкіндігі бола тұра көмірді орташа тәуліктік жөнелту 23 маршрутты құрады.
Кеңесте көмірдің біркелкі жиналмауы жылыту маусымының ең жоғары кезеңдерінде тасымалдарды қиындатуы және қауіпті жағдайлар туғызуы мүмкін екендігі атап өтілді.
ҚТЖ-да көмірді онлайн режимде жеткізуді бақылаудың интерактивті жүйесі құрылады. Әрбір станция ақпаратты тиісті формаға енгізеді, содан кейін орталық штабта деректер жиналады және талданады. Бұл қатты отынды тасымалдау жағдайын бақылауға және барлық сұрақтарға жедел ден қоюға мүмкіндік береді. Жақын арада осы платформаға көмір разрездері, жүк алушылар, жүк жөнелтушілер қол жеткізе алады.
Кездесу қорытындысы бойынша жүк жөнелтушілер Ұлттық тасымалдаушымен пайдалы диалог жүргізілгенін атап өтті. «ҚТЖ-Жүк тасымалы» ЖШС барлық мәселелерді үндестіру және тасымалдаудың тұрақты стратегиясын айқындау үшін әрбір көмір разрезімен бірқатар кездесулер өткізуді жоспарлап отыр.