Жүк шаруашылығында кереғар көрсеткіштер кеміген
Тараз қаласы бойынша меншікті тілші
Биылғы жылдың өткен жеті айында Жамбыл бөлімшесінде жүк шаруашылығы бойынша пойыздар қозғалысында ешқандай ақау орын алған жоқ. Дегенмен, осы мерзімде қауіпті жүк саналатын цистерналарды бөлімше арқылы транзиттік, яғни коммерциялық тасымалдауда екі вагон ағытылған.
Оған себеп, матор жанар-жағармайы тиелген цистерналармен жүк жөнелтуде «Петро Қазақстан Ойл Продакс» компаниясының ҚР «Теміржол көлігі туралы» Заңының 45-бабына кереғар келген әрекеті болып тұр.
– Жүк тасымалындағы қауіпсіздік шараларын көтеру мақсатында бөлімше басшылығымен кешенді іс-шаралар қабылданып отыр. Станция басшылары және коммерциялық тасымалға жауапты мамандармен тұрақты селекторлық жиын өтіп, қозғалыс қауіпсіздігін ұйымдастыру жұмыстарына техникалық ревизия ұйымдастырылып отырады, – дейді Тасымалды ұйыдастыру және тасымалдау шарттары бөлімінің бастығы Болат Абдуов.
Ал жүк тасымалының қауіпсіздігін қамтамасыз ету бағытында ағымдағы жылдың жеті айында ешқандай олқылықтар болмағанымен, теміржол мүлкіне қол сұғудың бір оқиғасы орын алған. Сонымен қатар «пломбының» бұзылуының да бір фактісі тіркелген.
– Станция басшыларына, жауапты мамандарға темір жол мүлкіне қол сұққан жағдайда, қылмыстық жауапқа тартылып немесе материалдық шығынға түсетінін түсіндіру шараларын күшейту тапсырылды. Әсіресе Тараз, Шу станцияларының басшыларына жұмыс орнында практикалық дәрістер өткізу міндеттелді. Бұл жұмыстардың нақтылығын анықтап отыру мақсатында ай сайын желілік полиция бөлімінің ақпараттарымен салыстырмалы түрде тексеріліп отырады. Және жұмыстар жыл соңына дейін жүргізіледі. Дегенмен, алдыңғы жылға қарағанда былтыр да, биыл да жүк шаруашылығындағы қауіпсіздікпен байланысты кереғар көрсеткіштер кеміген, – дейді бөлім басшысы.