ШЫҰ саммитінде Тоқаев «ТрансАлтай диалогына» қолдау білдірді
ШЫҰ-ға мүше мемлекеттер басшылары кеңесінің отырысында сөз сөйлеген мемлекет басшысы Қасым-Жомарт Тоқаев көлік-транзит саласындағы серіктестікті нығайтудың маңыздылығын атап өтіп, «ТрансАлтай диалогы» бастамасына қолдау білдірді, деп хабарлайды Rail-news.kz.
Президенттің айтуынша, 150-ден астам елді қамтитын «Бір белдеу, бір жол» мегажобасы сауда-логистикалық операцияларға жыл сайын 1,5 триллион долларға дейін пайда әкелуі мүмкін. Бұл тұрғыда Солтүстік – Оңтүстік, Шығыс – Батыс және Транскаспий дәліздерінің әлеуеті зор екені айтылды.
Қазақстан, Ресей, Қытай және Моңғолияның қатысуымен жүзеге асатын «ТрансАлтай диалогы» Еуразиядағы Алтай аймағының географиялық және экономикалық артықшылықтарын тиімді пайдалануға жол ашады.
Президент ірі жобаларды іске асыру үшін мемлекеттер арасында көлік байланысын күшейтіп, транзиттік-тарифтік стратегияға сәйкес тәсілдер әзірлеу қажеттігін айтты. Бұл мәселе қараша айында Ақтау қаласында өтетін ШЫҰ порттары мен логистикалық орталықтары басшыларының алғашқы форумында талқыланбақ.