Астана-Семей пойызына Starlink интернеті қосылды

Астана шаһары мен ел шығысы – туристердің теміржол арқылы ең жиі қозағалатын бағыттарының бірі. Бұл орайда жолаушылардың игілігі үшін өтіп бара жатқан наурыз айында бұрын-соңды болмаған бірқатар елеулі іс-шаралар орын алды. Барлығы да жолаушылар игілігі үшін.

Мәселен, аурыз айының орта шенінен бастап «Нұрлы жол - Семей» бағытында жаңартылған RWS Wagon компаниясының заманауи жайлы вагондары қолданысқа енгізілген болатын. Осылайша, барлығы 9 вагоннан тұратын пойыз толыққанды жаңарған еді. Осынау жағымды жаңалық жалғасты болып, жуырда тағы бір ерекше жайт орын алды. Атап айтсақ, «Транстелеком» АҚ ұсынған Starlink спутниктік ғаламтор желісі ендігі аралықта №122/121 Астана-Семей жолаушылар пойызында да қолжетімді болып отыр. Өткен наурыз мерекесі күндері аталған пойызда заманауи «Цифрлық вагон» пилоттық жобасы ресми түрде іске қосылды.

Айта кетерілігі, бұл жоба әзірге тек екі вагонда ғана жүзеге асырылуда. Бұл ретте вагондардағы Wi-Fi желісі және әр орынның жанында орналасқан USB-розеткалар жолаушыларға үнемі сыртқы әлеммен байланыста болып, оқу, жұмыс істеуге мүмкіндік беруде. Осылайша жолаушылар жол барысында интернетті еркін пайдаланып, фильмдер мен сериалдар көре алады, кітап оқып, ойын ойнап, түрлі пайдалы ақпараттарға қол жеткізе алады. Ғаламтор қызметі тегін әрі  қолжетімді.  

«Жаңа жоба сапарды мейлінше жайлырақ етіп, жол үстінде цифрлық мүмкіндіктерді кеңейтуге бағытталып отыр. Ал, алдағы уақыттарда нәтижесіне қарай жоба ауқымын кеңейту жоспарлануда. Бұл бастама теміржол көлігіндегі цифрлық мүмкіндіктерді арттыруға және жолаушыларға мейлінше қолайлы жағдай жасауға бағытталып отыр» делінген «Транстелеком» АҚ таратқан ақпаратта.

Бұл тестілеудің алғашқы кезеңі. Алдағы уақыттарда шығысқа қатынайтын барлық пойыздарға жоғары жылдамдықтағы спутниктік интернет орнату жоспарлануда. Жаңа жоба теміржол көлігін цифрландыруды дамыту аясында жүзеге асыруда.

Тоқтала кетсек, осыған дейін «Жолаушылар тасымалы» АҚ Eutelsat OneWeb, Jusan Mobile және Kaztechnology-мен серіктестікте №67/68 «Астана – Өскемен» пойызында да жоғары жылдамдықты спутниктік интернетті іске қосқан болатын. Аталған жаңалықтардың барлығы сөз жоқ, туристер нөпірі мол ел шығысындағы жолаушылар тасымалындағы қызмет сапасының жақсарғанының айғағы.