Ұлттық компания теміржол қауіпсіздігін цифрлық жүйелер арқылы күшейтуде
«Қазақстан теміржолшысы» газетінің тілшісі
Ұлттық компания пойыздардың қозғалыс қауіпсіздігін қамтамасыз ету мақсатында өндіріске цифрлық жүйелердің дендеп енуіне үлкен мән беріп отыр.
Осы бағытта Мойынты – Балқаш, Бескөл – Достық, Бескөл – Разъезд-2 учаскелерінде орталықтандыру және автобұғаттау жүйелерімен біріктірілген микропроцессорлық орталықтандыру құрылғылары іске қосылған. Бұл өз кезегінде пойыз қозғалысын басқарудың қауіпсіздігі мен тиімділігін арттыра түскен.
Сонымен қатар 10 станцияда пойыздарды қауіпсіз жүргізуді қамтамасыз ететін құрылғылар салынса, электр орталықтандыру жүйесінің қоректендіру жабдықтары жаңартылып, 31 қоректендіру панелі мен 39 дизель-генератор агрегаты ауыстырылған, сондай-ақ 19 станцияда маневрлік аудандар мен дөңестерге арналған МП АСДЦ жүйесі енгізілген. Сұрыптау жүйелерін дамыту бағдарламасы да инфрақұрылымды дамыту бағытындағы негізгі міндеттердің бірі болып отыр.
Бұдан бөлек біраз жұмыстың басы қайырылғанын көруге болады. Мәселен, бүгінде Қарағанды – Сұрыптау станциясының жұп дөңесін жаңғырту бойынша жобалық-сметалық құжаттама әзірлеуге келісімшарт жасалса, Қарағанды – Сұрыптау станциясының тақ дөңесі мен Ақтоғай станциясының дөңесін жаңғыртуға арналған техникалық тапсырмалар әзірленген.