Инфрақұрылымды жаңғырту жалғасуда
Абай облысы бойынша меншікті тілші
Семей жүк тасымалы филиалы бойынша соңғы жылдары теміржол инфрақұрылымын жаңғыртуда көптеген тың жобалар қолға алынып, сәтімен іске асырылып келеді. Әсіресе өндірістік процестің тиімділігін арттыруға бағытталған жаңашылдықтар қатары мол.
Мәселен, жуырда ұлттық компанияға қарасты теміржол инфрақұрылымын жаңарту бағдарламасы аясында жүк ағыны аса мол Ақсу – Жаңа-Семей теміржол учаскесін жаңғыртудың екінші кезеңі толықтай аяқталды. Қарқынды жүргізілген жұмыстар нәтижесінде жоспарлы шаралар орындалып, пойыз қозғалысын басқару, қозғалыс қауіпсіздігін сақтау ісінде соны көрсеткіштер орын ала бастады.
Атап айтсақ, ұзындығы 139 шақырымдық учаскеде басқаруды орталықтандырудың микропроцессорлық жүйесіне жеті бөлек пункт қосылды. Оның сыртында телім бойында екі жаңа жол айрығы пайдалануға беріліп, тағы бір жол айрығында жаңа қабылдау-жөнелту жолдары салынып, пайдалануға берілді. Мұнымен қатар Дегелең, Шаған, Известковый, Көл станциялары да дамытылды. Соның ішінде көмір тасымалында алғашқы орында тұрған Дегелең жүк станциясындағы 6 қабылдау-жөнелту жолдары 9-ға дейін көбейтілді. Бұл іс-шаралар өз кезегінде станция жұмысын жеделдету, пойыздарды қабылдау және жөнелту процестерін оңтайландыруға мүмкіндік берді.
Жаңа жоба осылайша шығыстағы іргелі магистральдың өткізу қабілетін арттыруға, пойыз қозғалысы жылдамдығын ұлғайтуға және жүк тасымалының сенімділігін қамтамасыз етуге тыңнан мүмкіндік ашып отыр.
Жалпы, Ақсу – Жаңа-Семей учаскесін жаңғырту жобасы отандық теміржол инфрақұрылымын дамыту және байтақ еліміздің транзиттік әлеуетін нығайту жөніндегі жүйелі жұмыстардың бір бөлігі болып табылады. Осы іс-шаралармен бірге Жаңа-Семей станциясы сандық технологиялар мен инфрақұрылымды жаңғырту да дамуда. Бұл бағыттағы жоспарлы жұмыстар «ҚТЖ» ұлттық компаниясының цифрлық трансформациясы аясында маневрлік жұмыстардың тиімділігін арттыру жобасына енгізілген.
– Бүгінгі таңда магистральдық желінің жаңғыртылған учаскелерінің жалпы ұзындығы 1 142 км құрап отыр. Инфрақұрылымдарды жаңарту жобасының тиімділігін осынау телімнің бойындағы шағын станциялар мен жол айрықтарындағы барша қозғалысшылар қауымы да айқын сезініп отыр. Міне, соның нәтижесінде жүк және жолаушылар ағыны мол Дегелең – Жаңа-Семей телімі толық қуатында жұмыс істеуге мүмкіндік алды, – дейді бұл орайда пікір білдірген телім бойындағы Шаған станциясының бастығы, тәжірибелі теміржолшы Айдос Тоқтаров.
Бұлай деп сеніммен айтуға толық негіз бар. Себебі аталмыш магистральды дамыту ондағы жүк тасымалдау уақытын айтарлықтай қысқартып, пойыздардың қозғалыс жылдамдығын біршама еселеген.