Шетпенің жаңа келбеті

Маңғыстау облысының Шетпе станциясында күрделі жөндеуден соң қайта жаңғырған теміржол вокзалы пайдалануға берілді. Осыдан алпыс жыл бұрын салынған вокзал ғимараты жаңғыртудан кейін бес есе ұлғайып, барлық қауіпсіздік және заманауи стандарттарға сәйкестендірілген.

Мемлекет басшысының тапсырмасын іске асыру шеңберінде Үкімет пен Көлік министрлігінің және «Самұрық-Қазына» АҚ қолдауымен ҚТЖ-ның өз қаражаты есебінен орындалған жұмыс көлемі аса ауқымды болды. Қаңқасынан бастап толықтай қайта салынған Шетпе вокзалын жаңғырту барысында құрылыс монтаж және әрлеу жұмыстарының толық кешені жүргізіліп, инженерлік желілер түгел қайтадан құрылған.  

Шатыр мен қасбетті жабу, инженерлік желілерді төсеу, ішкісыртқы әрлеу және аумақты абаттандыру жұмыстары жүргізілген. Нәтижесінде вокзал ауданы 200-ден 1000 шаршы метрге дейін ұлғайтылды, оның 500 шаршы метрін жертөледе орналасқан техникалық аумақ алып жатыр. Ғимарат қауіпсіздіктің, энергия тиімділігінің және қолжетімділіктің заманауи талаптарына сәйкес келеді.

Сонымен қатар ауданы 2100 шаршы метр жаңа жолаушылар перроны салынған. Қозғалысы шектеулі азаматтарға тактильді тақталар орнатылған. Ғимарат аумағы абаттандырылып, заманауи навигация элементтері қойылған.  

Вокзал ғимаратының ашылу салтанатына облыс әкімі Нұрдәулет Қилыбай, «ҚТЖ-Жүк тасымалы» ЖШС – «Маңғыстау» филиалының директоры Қарақат Жақанов бастаған билік өкілдері мен теміржол басшылары, ардагерлер қатысты. Құрылыс жұмыстарын жүргізген «Zangar SG» ЖШС өкілі нысанның кілтін табыстап, ардагерлер ақ батасын беріп, ғимараттың есігі халыққа айқара ашылды.  

Қонақтар қазақстандық өндірістен шыққан материалдар пайдаланылған, жаңа жиһаз бен заманауи жабдықтар орнатылған су жаңа вокзалды аралап көріп, ғимараттың сапа, қауіпсіздік және қолжетімділік стандарттарына сай жасалғанын атап өтті. Жаңа вокзал ұзақ жылдар бойы халыққа қызмет етіп, әрбір жолаушыға қолайлы жағдай жасайтынына сенім білдірді.  

Шетпе вокзалы 1 типті және күн сайын 100-ге жуық жолаушыға қызмет көрсетеді. Станция арқылы Семей, Қарағанды, Маңғыстау, Ақтөбе, Атырау және Орал бағыттары бойынша 16 жолаушылар пойызы қатынайды.  

Бұл аптада Шетпеден бөлек Павлодар облысының Қарасор станциясында да жаңа вокзал ашылды. Ескі ғимарат толық жөндеуден өтіп, сумен жабдықтау, кәріз, жылыту, электрмен жабдықтау және байланыс жүйелері жаңартылған. Заманауи желдету және өрт қауіпсіздігі жүйелері орнатылып, қимыл-қозғалысы төмен жолаушылар үшін пандус, тактильді навигация және арнайы күту бөлмесі жабдықталған.